Campesín ilustráu, patriota y repunante

Como tolos fines d’añu, David y los collacios del 25 de mayu díbemos a venos esti vienres pa comer un pote en Felechosa. D’alguna manera tará con nosotros, brindaremos con él pol reconocimientu de la UNESCO a la sidra y quexarémosnos un año más por nun poder facelo pola oficialidá pola que él tanto trabayó.

David Rivas morrió con 67 años habiendo fecho munches coses y dexando otres munches por facer. Él yera un home enciclopédicu con una treintena llibros publicaos. Economista de carrera y profesión, pero que afondó n’otros temes que teníen que ver cola so curiosidá infinita y la so pasión por Asturies.

Fai menos de 15 díes dexó lo que podemos considerar como’l so testamentu intelectual nestes páxines de LA NUEVA ESPAÑA con dos artículos sobre la sidra y el patrimoniu de la Unesco que resumen la so trayeutoria: datos serios, referencies históriques y una mirada crítica sobre la élite asturiana que nu ye quien a guiar el país.

David dicía que él yera radical, pero non estremista. Esa radicalidá de dir a la raíz del problema, de pensar Asturies en clave asturiana y n’asturianu, costo-y l’ostracismu del establishment institucional y académicu en casa, mientres yera bienveniu en Madrid y en organismos de la ONU, la UE o el Club de Roma.

Presumía de ser un campesín ilustráu y yéralo. Tamién yera un patriota asturianu y un repunante de primera y coñón que hasta presidió el Conceyu Nacional de Repunantes.

Poques hores antes de colar publicó en facebook una semeya perguapa de la lluna llena fecha dende so casa col testu : "La lluna guarez Candanal, acompagada por un Xúpiter rellumante". Lluna y Xúpiter que acompañen agora a un paisanu, sabiu y asturianu hasta la tarabica, que nun dexaba de poner nos momentos que pagaben la pena".

Suscríbete para seguir leyendo