De gochos y samartinos

Por Samartín gruñe’l gochu no cubil. Agora más bien el gochu gruñirá no matadero, onde por comodidá muncha xente lu lleva a gorar, y asina yá nun faen falta matachines. Del mataderu vuelve espiezáu, y preparáu pa salar, conxelar, facer l’embutíu y demás. Nos pueblos queda poca xente y la mayoría d’avanzada edá, que yá nun tán pa facer estos llabores que riquieren abondo esfuerzu ya dedicación.

La carne del gochu siempre formó parte del sustentu n’aldea. L’ama la casa tenía a gala cebalos bien y competía coles vecines a ver quién los llevaba al samartín meyor cebaos. Los samartinos son díes de munchu trabayu: escuartizar, salar, llavar les tripes, facer l’embutíu, afumalu y otres xeres. Antaño l’ama la casa había ser quien a que’l embutíu durare pa mantegar el pote tol añu, hasta la siguiente matada y saber guardar lo meyor del gochu pa feches señalaes, como l’antroxu, que se comía la caramiel.la, o nes mayaes y nes fiestes del pueblu, onde nun faltaba’l llacón y los chorizos a fartar. El xamón comíase de ralu en ralu, porque la necesidá obligaba a vendelos y como muncho namás se dexaba ún pa casa.

Güei préstame ocupame del gochu asturcelta. Esti animal carauterízase poles sos cualidaes úniques, tanto na so crianza como na so carne; una raza autóctona que se foi quedando con pocos exemplares en favor d’otres races que fueron enllenando los cubiles por distintes razones; races foriates de les que se convenció a la xente que yeren meyores y de más rindimientu y pola comodidá que suponía que’l gocheru los llevare a la casa. Amás les polítiques forestales qu’impidieron que los animales aprovecharen los montes. Asina fueron amenorgando la querencia pola raza autóctona, llegando cuasi a desaniciase. Foi nos últimos años del sieglu XX cuando un grupu de ganaderos determinaron entamar y trabayar pola recuperación del gochu asturcelta; según testimoniu de los criadores de gúei, de primeres entamaron la crianza con tres goches y un borrón, recuperaos nos conceyos d’Ayande, Eilao, Cangas del Narcea y Miranda y al empar fundaron la nomada Asociación de Criadores del Gochu Astrucelta (ACGA) que dende aquello nun cesó de trabayar pola so recuperación. Hubo años meyores, pero agora, según m’informó Javier García Santana, criador d’esta raza, son unos 26 ganaderos los que se dediques a la so cría y hai unos 800 exemplares. Un númberu mui baxo, pensando na cantidá de carne que se consume d’esti animal en toa Asturies. Son gochos criaos nel campu, comen los productos de temporada: mazanes, castañes, abiyotes y tolo qu’alcuentren por montes y praos, lo que fai que la carne, el tocín, los embutíos y el xamón seyan un manxar na nuesa gastronomía.

Una pena que l’aldea asturiana se tea quedando ensin xente y nun s’afite la idea de criar races autóctones, tanto del gochu como la cabra bermeya, la oveya xalda, l’asturcón, la vaca asturiana de los valles, la pita pinta y demás. Tamos nun momentu que necesitamos apostar polo nueso, polo singular que tenemos y que se da bien nel nuesu entornu. Dalgo qu’amás sofita la economía del país y nos apega al llugar colo que siempre foi distintivu pa nós.

Como esti añu tuvi el gran honor de que dende l’ACGA me nomaren "Amiga del Gochu asturcelta", siéntome venceyada a los criadores y procuraré apoyar, animar y esparcer siempre la querencia pola cría d’esti gochu agora "amigu" y por estensión esparder la cultura de lo nueso, de lo que siempre m’ocupé. Préstame animar a la mocedá que güei se fai cargu de les grandes ganaderíes y del trabayu n’aldea asturiana, a que piensen nesta crianza de races autóctones pa que nun se desanicien. Ye bien importante que s’enfoten nestes prautiques de cría sostenibles con iniciatives qu’afiten la biodiversidá y el cuidáu del mediu ambiente y pa poder disfrutar d’aquello que la nuesa tierra puede alimentar.

Felicitar a l’Asociación de Criadores del Gochu Asturcelta (ACGA) pol llabor, pola entrega y pol enfotu col que tán dedicaos a la recuperación d’esta raza y agradece-yos que me tuvieren en tanta consideranza faciéndome amiga d’esti gochu de nuesu, mansu, sociable y formosu, amás de sabrosu. Ánimu amigos.