Nuevo capítulo de "Parando en Villalpando": Ikigai

–¡Home, Chemona! ¿Y esa cara de felicidá?

–Ikigai.

–Meca, ¿salisti del armario?

–No, home, non ye eso.

–¿Entós?

–Ye japonés. ‘La razón de ser’.

–¿Cómo ye, ho?

–Un método japonés pa tener la felicidá.

–¿Pero entós…? ¿Tuvisti en Okinawa?

–No, tuvi en Olloniego, pasé allí la Semana Santa. ¡Qué equivocáu taba!

–¿Por?

–Nun sé, Xicu, yo pensaba que la clave yera tar activu, facer actividaes que estimulen la mente y el cuerpo…

–Home, claro, Chema.

–Qué va, qué va. Resulta que tuvi cultivando…

–¿La güerta?

–No, coño, el ikigai.

–¿Llevóte la to muyer a Ikea?

–Que no. Que yá topé’l propósitu que da sentíu y motivación a la mi esistencia.

–¿Qué dices, Chema? ¿Tas mamau?

–¿Tu pensasti cuál ye la razón pola que te levantes peles mañanes?

–¡Coime, el puñeteru despertador!

–Refiérome a aquello que fai que la vida valga la pena.

–Home, yo…

–La vida ye demasiao corta, Xicu, pa nun facer lo qu’amamos.

–Yá, coime, pero nun voi pasar el día faciendo casadielles.

–El ikigai enséñate tu auténtica vocación, aquello en lo que yes buenu.

–Ah. ¿Y tu yá lo topasti?

–Sí, ho. Yo soi buenu pa folgar.

–Home, Chema, nun me fastidies.

–En serio. Lo mío, básicamente, ye rascame los güevos.

–¿Y eso lo descubriste en Semana Santa?

–Sí, a lo pijo, eh. El Domingo de Ramos levanteme a les doce, almorcé a la una, y a les dos yá taba rendiu. Acosteme, Chema, y… vi la luz.

–¿Qué luz, ho?

–¿A ti no te interesa un retiro?

–Toi nello, Chemona. De momento, contrato relevu.

–Yo, Xicu, toi totalmente capacitáu pa nun facer nada.

–¿En serio?

–L’arte milenario de nun mover nin una pestaña si nun ye puramente necesario.

–Meca, hai que valir, eh.

–Y tomase les coses con calma, adoptando una actitú pausada.

–¡Uf! Tien que ser duro, sí.

–¿Tu sabes lo que ye topar la felicidá sin movese del sofá?

–Home, siendo vocacional… Si ye lo que te tira, ¡a por ello!

–Y disfrutar de les pequeñes coses: vermutín, aceitunes…

–Claro. Porque un día vas date cuenta de que yeren les coses más grandes.

–Eso ye, Xicu. Cada persona ye un mundo y lo mio ye folgar.

–Yes un fenómeno, Chemona.

–Tengo una paz interior que flipas…

–Nun hai más que vete.

–Soi el Gandhi del pigazu, el Messi del descansu… ¡Home vaaaa!

–Qué envidia, chaval. ¡Menuda cara de felicidá!

www.maxirodriguez.net