Pola llibertá llingüística

¿Cómo ye posible que güei, más de cuarenta años depués d’aprobase l’Estatutu d’Autonomía, les llingües propies d’Asturies nun tengan la consideración d’oficiales? La reivindicación de les llingües propies del país y de la so oficialización ye una cuestión que tien una faceta doble: Per un llau ye la llibertá d’escoyer qué llingua usar en cada momentu; pero tamién qué modelu de sociedá queremos. Si nuna determinada comunidá s’emplega más d’un idioma, el que toos ellos tengan la mesma consideración y amparu llegal ye signu de tolerancia y salú democrática. La reconocencia de la llingua asturiana y del gallego-asturianu como oficiales nun significa otro que l’amparu de la llibertá d’escoyer qué llingua quiés usar en cada momentu. Los sos detractores nun faen otro que defender la desigualdá xurídica d’unes persones frente a otres. Ye mui significativo que quien s’oponen testeronamente a la oficialidá de les nuestres llingües seyan los mesmos que nieguen derechos a les muyeres, a los inmigrantes, a les persones lgtbiq+, cuestionen el cambiu climáticu...

Nun hai nenguna norma estatal que defina’l términu oficialidá, cada territoriu desarrolla de manera particular su aplicación. Asina, seríemos los asturianos y asturianes, quien decidiríemos qué modelu y qué consecuencies tendría la declaración como llingües oficiales del asturianu y del gallego-asturianu; namás dende postulaos ideolóxicos intolerantes se puede tar a la contra d’ella. Polo tanto, el Partíu Popular tien qu’escoyer con quien s’allinia, si con quien defendemos la llibertá y la convivencia llingüística o colos negacionistes de la realidá idiomática de la nuestra tierra.

A lo llargo d’estos más de cincuenta años de reivindicación llingüística, los distintos sectores involucraos nella desenvolvieron un llabor inxente y d’una calidá incuestionable que punxo a nuestres llingües propies na meyor de les situaciones posibles pa encarar el so futuru y pervivencia. La sociedá asturiana tamién ta preparada, que nesta cuestión va muncho más avanzada que los sos representantes políticos, viviendo la so realidá idiomática cola mayor de les naturalidaes. Otra manera, la falta d’oficialidá nun ye disculpa pa que dende’l Gobiernu Asturianu s’actúe positivamente en favor de les nuestres llingües, desenvolviendo una política llingüística merecedora d’esi nome. Pidímos-y que desarrolle acciones nesta materia, que doten de medios y financiación amañosos a los servicios de normalización, ameyoren la situación de la enseñanza, conviertan a la RTPA nun verdaderu mediu de normalización, aprueben el Plan de Normalización...

La situación actual de non oficialidá diz mui poco a favor de la clas política . La denominada Transición nun va dase por acabada dafechu n’Asturies hasta que la oficialidá seya una realidá, la falta de concreción de la mesma respuende a criterios predemocráticos que n’otres comunidaes foron superaos hai cuantayá. Namás se trata de que la normalidá y la sensatez que sobre esti tema muestra mayoritariamente la sociedá asturiana llegue a los sos representantes políticos.

Suscríbete para seguir leyendo