En toles ocasiones

El 25 de mayu ye’l día de la bandera d’Asturies. Y esto, anque pueda desconocese por munchos asturianos tien una desplicación histórica. L’orixe d’ello ye l'informe de Xovellanos redactáu en 1794 onde describe y propón una bandera. Esta s'usa per vez primera nel llevantanientu d'Asturies a los franceses en 1808 y la necesidá de crear una bandera pal éxercitu asturianu. Esto supunxo una resistencia popular y una muestra nidia de soberanía ya identidá como pueblu xuníu.

Esti añu, convocóse un "Asturias challenge" pa conmemorar esta fecha con rostros bien conocíos posando nes redes cola bandera del nuestru país. Apueste a celebrar pola nuestra autoestima colectiva, p'afirmanos como lo que somos ensin complexos y, sobre too, con conocimientu de causa. Caún ye llibre de sentir lo que quiera, pero polo menos sabiendo mínimamente d’ónde se vien. Ehí n’Asturies tenemos una asignatura pendiente. Tamos nello.

Asturies tien una historia, cultura y llingua mui rica. Estudiémosles, lleamos nelles y con elles, falemos d’elles con amor, con discrepancia, con sorpresa, si cabe. Pero vamos facelo con altor de mires, ensin vergoña, dialogando con posu e intelixencia. Esti 25 de mayu, con memoria, vamos a poner afuera la bandera, pa que toos sepan que llevamos a Asturies dientro "en toles ocasiones".

Suscríbete para seguir leyendo