Hai veces que’l dolor y les emociones nos dexen cuásique ensin pallabres. Quedámonos mudos ante la realidá de la muerte porque nun hai pallabres que nos resignen cuando recibimos la noticia de la partida d’un ser queríu, nesti casu d’un compañeru escritor. Acaba dexanos Luis Arias Argüelles-Meres. La muerte siempre nos sorprende. Enxamás tamos preparaos pa recibila. Por mediu d’estes llinies mándo-yos el mio más sentíu pésame a la so familia y allegaos, nel mio nome y nel nome de l’Asociación d’Escritores d’Asturies, que presido.
Foi precisamente la pallabra l’arma que siempre utilizó Luis Arias pa defender aquello no que creía. Escritor comprometíu colos sos ideales, profesor, articulista y gran orador, foi amás incansable defensor de la cultura y de la llingua asturiana. Déxanos una estensa obra, na que s’espeya fondes crítiques sociales y polítiques, escritos enllenos de sabiduría y d’amor a la tierra.
Luis Arias foi sociu de l’Asociación d’Escritores d’Asturies, y siempre collaborador con nosotros en distintes actividaes. Tuviemos el gustu d’entrega-y el Premiu de la Crítica d’Asturies na modalidá de columna periodística nel añu 2014, premiu que recibió con emoción y agradecimientu, más por ser un reconocimientu na so tierra.
Cuando se va un escritor, magar que dexe tantos ríos de tinta como nos dexa Luis, vase con él l’archivu sentimental, cultural y vivencial nel que, de xuru, inda tendría guardaes abondes coses. Déxanos, eso sí, una bayurosa herencia, déxanos la so pallabra en llibros y artículos, y precisamente la so pallabra fadrá que siga viviendo entre nosotros. Como bien nos dexó dicho’l poeta Horacio, los escritores nunca muerren.
Fuimos compañeros nel IES Isla de la Deva de Piedrasblancas. Nesti momentu que-y dedico estes lletres viénenseme a la memoria munchos recuerdos y siento señardá d’aquellos tiempos. Señardá, esa pallabra que tanto-y gustaba a Luis, porque sentía señardá de tantes coses que vamos perdiendo nesta nuestra tierra.
Unvío-y a Luis, como últimu adiós, estes pallabres cariñoses coles que quiero espresar el dolor que sentimos pola so partida.
Luis, que descanses en paz.
