En Francia, nel sieglu XIX, creóse la llambiotada llamada Bûche de Nöel, esto ye, tueru de nadal, basada nesta tradición y que se popularizó per toa Europa. El dulce, qu'entovía ye tradicional en Francia per estes feches, reproduz mui esactamente lo que ye'l tueru del árbol, usando bizcochu y crema pal centru y chocolate pa la corteya. Dalgunes persones dicen que la fecha esacta de nacimientu ye 1834 nuna confitería de París llamada La Vieille France. En cualesquier casu, y fuere quien fuere l'inventor en dellos países europeos, ye nesti momentu muncho más conocíu'l pastel que la tradición que-y da orixen, hasta'l puntu que munches persones piensen que la espresión «Tueru de Nadal» nun pue referise a otro que nun seya la llambiotada.
