Esti vienres 30 d'ochobre, a les 18.30 na Factoría Cultural d'Avilés, Carlos Alba "Cellero" va poner n'escena "Ecolocuentos", onde presenta versiones de cuentos tradicionales africanos y perses. Trátase d'una actividá qu'entama la Estaya de la Llingua del Conceyu d'Avilés en collaboración cola asociaciación Reciella-Families pol Asturianu dientro de les actividaes infantiles del ciclu "La reciella de la Factoría". La historia de "Ecolocuentos" fala d'un pueblu que decide vender el monte centenariu que lu arrodia por mor de la crisis económica que los afuega. Sicasí, los neños y neñes nun quieren. Finalmente toos afayen qu'ensin monte nun habría cuentos y atopen una manera alternativa, y sorprendente, de sacar dineru pa nun tener que vender nada.
A cuenta d'esti filo conductor afilvánense histories sobre la naturaleza y el respetu, contaes por un xuglar errante. Basáu en cuentos tradicionales d'África, Persia, narraciones de Miss Florence Holbroock (del llibru "Mitoloxía de la naturaleza") y de N. Willer ("Contes d'ailleurs et d'autrefois"), la obra tien una dramaturxa inspirada na novela curtia "El magu de Sacramentu", de Mischa Damjam. Per otru llau, el 20 de payares próximu va ponese puntu final a les actividaes d'anguaño con "Retalinos", una representación d'Olga Cuervo y David Varela na que los protagonistes son una muñeca de trapu y un güelín que vive con ella.
