"El carbonu ta perdayuri. Úsase en combustibles, plásticos, papel, y en tolos fármacos que tomamos. Cuando los científicos desarrollen un fármacu, hai dos coses que, normalmente, faen más lentu'l procesu: la dificultá de crear molécules complexes, y cómo diseñales pa que vayan onde se necesita. Normalmente, los fármacos son molécules construyíes en procesos químicos llargos y enguedeyaos. Cuando hai que cambiar una parte pequeña de la molécula, ye habitual tener que cambiar tol procesu. Los químicos suañen con ferramientes que permitan enllazar los átomos de carbonu como pieces de LEGO. Pero... ¿Cómo podemos facer eso? El carbonu pue unise a otros cuatro átomos o molécules. Una especie inestable llamada carbín ye un carbonu con trés de los sos cuatro "güecos" llibres, llistos pa formar enllaces químicos nuevos. Marcos García Suero y el so equipu crearon una forma que non solo permite iguar carbinos nel llaboratoriu, sinón qu'amás permite enllenar caún de los trés "güecos" con cualquier fragmentu, en cualquier orde. Los carbinos pueden usase p'amestar fragmentos nuevos a molécules yá terminaes ensin tener qu'alteriar tol procesu. Y, cuando los fármacos o los candidatos necesiten un fragmentu específicu pa unise a una biomolécula concreta, los carbinos pueden usase pa conectar un fragmentu 'llave' al fármacu, pa que pueda dir directo a la so pesllera correspondiente. Anque ta nuna etapa inicial, esti descubrimientu prometedor tien el potencial d'acelerar de manera significativa'l descubrimientu de fármacos nuevos y va permitir acceder a medicamentos nuevos más rápido".
