Va seis años qu'entamó l'ambiciosu proxectu de la editorial Anaya pa col asturianu: espublizar los seis llibros de testu que correspuenden a la asignatura de llingua asturiana n'otros tantos cursos de la Educación Primaria nel nuesu país.

Al empiezu d'esti añu escolar xurdieron los llibros de los caberos años de Primaria, colo que'l proxectu d'Anaya queda completáu. Nél intervinieron cuatro nomes que representen lo meyor de pedagoxía de nueso: Xulio Berros, Iris Díaz Trancho, Pablo Texón y Montserrat Blanco Fernández.

Esta última, que s'incorporó nel últimu añu a la redacción de los llibros de cuartu, quintu y sextu de Primaria, ye mayestra d'asturianu dende hai bien d'años y respuende güei a les preguntes de La Nueva España pa falar d'esta bona noticia pa l'asturianu y pa los sos escolinos.

Según Blanco Fernández, na so estaya de trabayu quixo, ente otres coses, facer por animar a los críos a que "falen ente ellos, a que s'espresen correctamente n'asturianu y empleguen la llingua oral".

Y amás, basándose nel trabayu de Xulio Berros ya Iris Díaz Trancho, fexo'l llabor de propone-yos a los escolinos repasos a la fin de los diferentes temes, de manera tala que los estudiantes lleeran (y escribieran) testos rellacionaos cola cultura asturiana: asina, por exemplu, los guah.es de quintu de primaria van topar cantares colos que trabayar el so pallabreru, mentes que los de sestu tendrán fragmentos más rellacionaos cola historia d'Asturies y de la so llingua, "pa dir metiéndo-yos dalgo que tuviere que ver con conocer la so tierra, y con ferramientes qu'ellos van usar anguaño".

D'alcuerdu con Montserrat Blanco Fernández, el fechu de qu'una editorial tan grande como Anaya s'interese pola llingua asturiana ye "una reconocencia de la importancia de la materia, sobre manera hacia l'esterior, dende un puntu de vista social y de cara al restu de asignatures y materies".

A la hora de facer la programación y la guía didáctica de la asignatura -que redactó en bona midida Iris Díaz Trancho-, l'equipu que fexo los llibros hebo tener en cuenta una de les mayores torgues de la enseñanza del asturianu: la non continuidá de la asignatura. Pola mor de la optatividá de l'asignatura y del movimientu qu'hai, puede aportar a clas d'asturianu nos caberos años de primaria un rapacín que nunca lo cursó, y eso los llibros de testu de Anaya tienen que lo manexar: "L'asignatura d'asturianu tien de ser siempres un puntín más atractiva que les demás".

Estos llibros, según los sos autores, son un "fitu que va camudar la enseñanza n'asturianu porque Anaya ye una editorial grande", pero lo que se necesita verdaderamente "ye la oficialidá".