Les escritores más nueves vindiquen el papel de la lliteratura na escuela

Na lliteratura asturiana, les autores tienen fecho un llabor fundamental: dende Xosefa Xovellanos a Berta Piñán, pasando per Enriqueta González Rubín o María Xosefa Canellada, toes contribuyeron -ente otres coses d'igual valir- a fixar la llingua lliteraria asturiana. O lo que ye lo mesmo, a fixar un mundu col que falar d'otros mundos.

Pa cellebrar esti día, el suplementu "Escolinos" quixo entrugar a dos de les poetes más nueves en llingua asturiana cuála ye la so visión del papel qu'ha tener la lliteratura nes escueles y, más concretamente, cómo puede'l trabayu lliterariu facer por iguar los problemes de xéneru ente los escolinos.

Mesmo María García Díaz (La Pola Siero, 1992) que Raquel F. Menéndez (Vallouta, Salas, 1993), que tienen espublizao respectivamente los poemarios "Llírica astraición" (Saltadera, 2016) y "El llibru póstumu de Sherezade" (Impronta, 2017), entamaron a desendolcar el so proxectu lliterariu nos años d'escuela.

Poro, conocen bien la importancia de la lliteratura nes escolines: Raquel F. Menéndez, asina, afirma que "nesa etapa la escritura ye una manera d'afitar el mundu imaxinariu, llendalo y asina desarrollalo meyor". Según la escritora de Salas, "ye una actividá clave pa qu'una pueda autorrepresentase llibremente".

D'otra manera, María García Díaz considera qu'habría qu'animar a los críos a que entamaren a "escribir ensin prexuicios y ensin munches espectatives" de tala manera que "nun pospongan l'escribir porque piensen que nun lo van facer lo suficientemente bien". "Lo más guapo d'escribir", afirma la polesa, "ye'l procesu, y cuantes más veces s'escribe más prestoso se torna".

Les dos escritores coinciden en qu'hebo una ablucante ausencia de figures femenines na so formación como llectores, y ambes tuvienon que facer por completar esi furacu. Sicasí, gracies a bones poetes como elles dos ye fácil que les xeneraciones más moces nun tengan una xera tan grande per delantre