La Oficina de Normalización Llingüística de Xixón continúa un cursu más ufriendo a les estremaes instituciones d'enseñaza del conceyu les sos actividaes, toes elles cola llingua asturiana como noyu central.

Anguaño tres d'estos programes empiezen a funcionar nes escueles de Xixón y de la so redolada: "Danciando tol añu", "¡Qué cuentu tienes! Esposiciones didáutiques itinerantes" y "Cantar presta muncho". Estos súmense, por supuestu, a los programes que desendolca la propia Conseyería d'Educación pente medies de l'Axenda didáctica, que ta yá p'acabar nesti cursu.

Les actividaes tán empobinaes a escolines y escolinos d'edaes mui diverses -la Oficina de Normalización cunta con programes pa críos dende la etapa de 0 a 3 años hasta Bachiller- anque mayoritariamente na Educación Primaria, que ye onde se topa la mayor parte del alumnáu de llingua asturiana pola mor del discutible sistema curricular na Educación Secundaria.

María Xosé Rodríguez López, responsable de la Oficina de Normalización y con quien falemos dende Escolinos, desplica que los oxetivos d'esti exitosu programa qu'aporta como tolos cursos a les escueles son "promover l'usu del asturianu ente los neños y neñes, asina como camudar los vezos llingüísticos de la reciella per aciu de la espresión oral, conectando la llingua con otros valores ya intereses". Quieren, amás, concienciar al mesmu profesoráu y a les families de la importancia de la tresmisión de la llingua n'etapes tempranes, esparder la lliteratura infantil n'asturianu, enganchar a la xente más nuevo?

Los oxetivos son enforma ambiciosos y ponse munchu procuru na organización de les actividaes: dende les esposiciones de cuentos infantiles, a los talleres de coru o de baille tradicional, too ta fecho mui curiosino, y nun resulta estrañu asina l'éxitu d'esta iniciativa.