Vien cellebrándose dende hai años, pero eso nun quita pa que la nueva convocatoria del concursu "Carta a los reis magos n'asturianu", qu'entama l'Ayuntamientu de Corvera, pente medies de la Casa de la Llingua - Serviciu de Normalización Llingüística, sía una mui bona noticia pa los escolinos d'asturianu.
Pa tener éxitu coles sos cartes, les ciento cincuenta neñes y neños de primer y segundu ciclu de Primaria que deprienden asturianu nel conceyu han portase bien, pero tamién han escribir curiosino. Esto, amás d'una llección sobre lo xuncíes que tán ética y estilística, ye una bona oportunidá pa que los críos desendolquen y amuesen la ferramienta lliterario.
Los neños que quieran participar tienen d'entregar la so carta a los reis magos, escrita n'asturianu, nel Centru Sociocultural de Las Vegas/Les Vegues, demientres el mes d'avientu.
El premiu, como nun podía ser d'otra manera, ye un lote de llibros escritos n'asturianu -"col envís d'animar a la llectura a los más pequeños", según declaren los organizadores- , y un vale por valor de 100 euros pa mercar material escolar nos comercios corveranos.
