El xueves 13 d'avientu de magar les 19:30 va tener llugar, nel Paraninfu de la Universidá d'Uviéu, la entrega del premiu María Xosefa Canellada a la meyor obra escrita n'asturianu que se correspuenda colos xéneros infantil o xuvenil. Nel actu van entregase tamién los restantes premios entamaos pola Conseyería (poesía, novela, cómic, etc.).
El galardón nesta edición recayó sobre l'escritor sotrondín Lluis Aique Iglesias, pola so obra Invisible. Lluis Aique Iglesias, nacíu en 1967 y a quien conocíemos hasta agora como autor de la traducción más acertada de la famosa comedia de Oscar Wilde (La importancia de ser Severu), llogró con Invisible "un tratamientu de temes d'actualidá con personaxes reales, con una bona estructura narrativa y un estilu lliterariu enllenu d'imáxenes simbóliques", según el xuiciu del xuráu.
El premiu lleva'l nome de María Xosefa Canellada, romanista y escritora que robló títulos fundamentales pa la lliteratura de nueso, como El bable de Cabranes o, nel campu de la lliteratura infantil, Montesín, qu'anició dafechu'l xéneru nes lletres asturianes.
