A primeros d'añu espublizóse n'Educastur, la web de la conseyería d'Educación, el Boletín Informativu de les Enseñances de Llingua Asturiana. Ente otres coses, nél recuéyense los resultaos de la evaluación que se fixo de la implantación del plan pilotu esperimental de promoción del usu del asturianu nel cursu pasáu.
Esti plan supón que l'alumnáu de 4u de Primaria qu'asina lo queria, previa aprobación del Claustru, el Conseyu Escolar y les families, pueda estudiar una de los dos sesiones selmanales de Ciencies Sociales, Ciencies Naturales, Educación Física o Educación Artística n'asturianu. El plan, a la fin, supón que munchos neños tengan la oportunidá d'estudiar daqué na so llingua materna gracies a una educación billingüe.
Los resultaos d'esti plan nun podíen ser más bonos, d'alcuerdu colo qu'apaez nel siguimientu presentáu por Fernando Padilla, director xeneral de Planificación Llingüística. D'ente los 105 críos participantes nel programa, cuasi la metá meyoraron los sos resultaos académicos pola mor del plan. Ye dicir, el Plan nun tien namás valir pola mayor conocencia de la llingua asturiana que presenten los guah.es, sinón qu'amás fai por que los estudiantes afiten meyor los sos conocimientos xenerales.
Arriendes d'ello, el 89,1% de les families que participanon ta satisfechu col funcionamientu del plan, y el 83,6 recomendaría a otres families la so participación.
Los centros que quixeron aniciar esti plan pioneru fonon el CP Santiago Apóstol de Mieres, el CP El Cotayo de Carbayín, el C.P. El Bosquín de L'Entregu, el CP Bernardo Gurdiel de Grau, el CP La Carriona-Miranda d'Avilés y el CEIP Xentiquina de Solvay-Lieres.
