Hai nueve años, la Oficina de Normalización Llingüística del Conceyu de Xixón creó un karaoke con dellos cantares n'asturianu. Llevaba por nome "Cómo nos canta la llingua" y la idea, claro, yera vehicular l'alfabetización na llingua asturiana pente medies d'un garrapiellu de lletres escrites nesta llingua, sobre manera empobinaes a escolinos de toles edaes.
El karaoke ye'l recursu caberu cuando les folixes tan a poques d'escarrilar, llevándonos peles siendes escures de la nueche. Ye'l plan b secretu de toles fiestes, una "orquesta valera" -según la so etimoloxía xaponesa- pola mor de la cual ún tien la oportunidá warholiana de ser per un intre'l mocín de la película. Too ello (la folixa amortigañada, el plan b, etc.) puede aplicase, con daqué mala lleche, a la situación de la llingua de nueso.
Pero arriendes de la folixa, el karoke tien el so fundamentu na pallabra escrita, anque ausente. Poro, ye un métodu mui afayadizu pa xuncir ociu y deprendizaxe, que ye una de les posibilidaes más eficaces pa la tresmisión y caltenimientu de la llingua asturiana nos escolinos. Agora, la Oficina de Normalización Llingüística de Xixón, que nel pasáu mes d'avientu conmemoró los sos 15 años d'actividá con una esposición nel Centru de Cultura Antiguu Institutu, ta acabante de xubir los estremaos cantares del so karaoke a la plataforma Youtube, onde les mayestres y mayestros podrán topar un material guapu y divertíu pa trabayar na clas.
Con cantares de dellos estilos, dende l'habanera de Carlos Rubiera -que munchos atalanten como un cantar popular- o'l folk balcánicu de La Bandina, hasta los temes más rockeros de Dixebra o Skama la Rede, tovía pueden garrase exemplares físicos d'esti proxectu na Oficina de Normalización, anque yá tán toos xubíos a la rede.
