Nos caberos díes de xineru conocíemos los resultaos d'una iniciativa bien guapa qu'organizanon dellos servicios, oficines y estayes de normalización llingüística de toda Asturies nun bon exemplu de coordinación ente alministraciones estremaes: llamábase "El mio cantar", y consistía nun concursu pa los escolinos de llingua asturiana de los cursos cuartu, quintu y sestu de Primaria, asina como pa los de primeru y segundu de la ESO de los conceyos y mancomunidaes participantes.
Estos pequeños creadores teníen, d'esti mou, la posibilidá d'escribir y grabar nos últimos meses del añu pasáu los sos cantares, mesmo en comuña qu'en solitariu. Les lletres habíen ser orixinales y tar escrites n'asturianu, y fonon munchos los escolinos que decidienon garrar el bolígrafu y ponese a escribir. El premiu, que-y correspondió a ún de los cantares escritos por los neños de cada conceyu o mancomunidá participante, yera qu'un artista profesional y venceyáu al so conceyu grabase'l so cantar.
Agora yá se fixenon públicos los ganadores del concursu: ente ellos tán, por exemplu, les escolines y escolinos del Centru Rural Agrupáu Cibea de Cangas del Narcea, col so cantar "Muitas cosas"; o los neños de primeru de la ESO del IES Víctor García de la Concha de Villaviciosa, col so tema "¡Vaya sociedá!".
Precisamente na web d'esti caberu institutu maliayu yá ye posible lleer la lletra del cantar escritu polos escolinos de primeru, que trata del machismu presenta na sociedá de nueso y ta inspiráu en ritmos y técniques propies del hip-hop y del trap, ye dicir, de les músiques que más-y presten a la xente nuevo. Según se recueye nel so blog, los escolinos del Víctor García de la Concha decidiénonse por averase a la cuestión de la violencia de xéneru "porque xusto naquellos díes yera -por desgracia- un tema d'actualidá" y teníen muncho que dicir. "¡Vaya sociedá!" contién versos tan curiosos y afilaos como estos: "Esi día tovía nun te conocía / tu tan tuyu y yo tan mía / entrasti pela puerta d'aquella cafetería / vite y matástime d'amor, ¡qué ironía! / pidisti un café p'amargar los tos llabios".
Per otru llau, según confirmen dende'l Serviciu de Normalización L.lingüística de Cangas del Narcea, va espublizase nos próximos meses un discu nel que van apaecer once cantares rellacionaos col concursu: los siete ganadores de los siete conceyos participantes na edición de "El mio cantar", asina como otros cuatro que'l xuráu quixo destacar. Según el Serviciu de Normalización, los once temes van ser grabaos "desinteresadamente" por "profesionales de la música que van dar voz a las aportaciones espectaculares de las nuesas nenas ya nenos".
Asina, por exemplu, el cantar ganador del concursu nel conceyu de Cangas del Narcea, que foi escritu pelos escolinos del CRA de Cibea, va ser grabáu pol grupu "L-R". Esti grupu, formáu por Rubén Bada y Leticia González, fai na so música una revisión del universu tradicional asturianu dende un puntu de vista nuevu y arriesgáu, y col so discu post-folk-asturianu ye una de les revelaciones de los últimos años na música asturiana. Dientro d'esi contestu, ye evidente'l valir del concursu de "El mio cantar", en cuantes que ye quien a poner en rellación a los escritores de cantares más mozos con profesionales de primer orde.
Arriendes d'ello, el día 29 d'abril se presentará el discu na Pola Siero, demientres una gala organizada pola Rede de Normalización Llingüística nos Conceyos.
