Nel momentu de deprender una llingua nueva, o d'afitar meyor dellos rexistros de la nuesa llingua materna, tienen un papel bien importante los cantares. Non namás porque fagan el procesu d'enseñanza más gayoleru y bayurosu, sinón tamién porque faciliten la memorización de los conteníos llingüísticos.
Gracies a los cantares que sentimos, somos quien a asonsañar, mesmo nel planu fonéticu que léxicu, l'inglés de Texas cantando un son de Hank Williams, o'l francés de Bélxica con ún de Jacques Brel. Poro, el karaoke que dende hai más d'un mes vien llanzando la plataforma PlayPresta paez bona ferramienta pa los escolinos que s'averen al asturianu.
PlayPresta ye un espaciu de la productora audiovisual Cuatro Gotes, que crea conteníu pa YouTube empobináu sobre manera a les xeneraciones milennial y Z. El karaoke, una de les caberes iniciatives de PlayPresta, inclúi cantares d'époques y xéneros estremaos, como "De llonxe, gano", de Silvia Quesada; "Mañana fría", de Dixebra, o "Echa un culín", de Luis Núñez y los Folgazanes.
El "Karaoke n'ast" de PlayPresta, qu'espubliza un cantar nuevu cada domingu, cunta yá con cinco temes, de los que s'ufren lletra, vídeu y una base musical que permite al cantante amateur poner la so voz percima de la música.
