Nos caberos años del sieglu pasáu y primeros del actual, l'estáu de la llingua de nueso ameyoró enforma no que fai a l'aceptación social, a la conciencia xeneral de la necesidá de protexela y estudiala y, en suma, a la dignificación del conxuntu. Sabemos más del asturianu (de la grámatica, el léxicu, la sociollingüística?) que nunca, pero sicasí la perda de falantes nun se detién, y el procesu de sustitución llingüística sigue trabayando de contino.
Poro, son munches les persones que dende ámbitos estremaos insisten na importancia de que l'asturianu sía la llingua materna de los asturianos, ye dicir, que nun dexe de tresmitise la llingua de güeles a nietes, de los que yá la falen a los qu'aporten de fuera. Esi sen, el de reconoce-y el valir a la llingua materna, ye'l que tien el Día de la Llingua Materna que proclamó la UNESCO en 1999 y que tien llugar, como tolos años, el 21 de febreru.
La fecha alcuérdamos les manifestaciones a favor de la llingua bengalí qu'asocedienon en 1952 en Paquistán demientres les que dos estudiantes fonon asesinaos, y va cellebrase per dellos conceyos d'Asturies con eventos de toda mena. Ente ellos, tienen especial importancia los dedicaos a (ya inclusive organizaos por) escolinos d'asturianu.
En dellos llugares yá empecipiaron los actos pol Día de la Llingua Materna enantes d'esti xueves: el pasáu día 13 la Conseyería d'Educación, al traviés de la so páxina Educastur, espublizó un manifiestu a favor de la llingua asturiana, y conviden a los profesores a lleelu colos sos escolinos. Nél s'afirma que "los idiomes garanticen la diversidá cultural y el diálogu intercultural", y que favorecen "l'apertura cultural del individuu a otres realidaes". La collaboración y el sofitu de los escolinos ye, amás fundamental, como se puede ver nel vídeu que grabanon les neñes y neños del IES Peñamayor, nel que los alumnos rellaten la importancia que tien pa ellos el caltenimientu de la llingua.
Arriendes d'ello, en Cangas del Narcea representose ayeri "Hansel y Gretel", de Papel Higiénico Teatro (ganadora del II Premiu Nel Amaro) nel Teatru Toreno pal alumnáu de Primaria de los centros educativos cangueses. Amás, como nel casu del institutu navetu, el propiu alumnáu va lleer un "manifiestu relacionáu cona importancia de la tresmisión de la ll.ingua materna".
N'Uviéu, nel Día de la Llingua Materna va proxectase nel Muséu Arqueolóxicu'l documental "La vida ensin oficialidá", tres lo cual habrá un alderique moderáu por Vítor Suárez, y cola intervención de Concha Masa, candidata a l'alcaldía, María Cueto, profesora de Secundaria, y Xosé Antón González Riaño, presidente de l'Academia y profesor de pedagoxía.
N'Avilés, per otru lláu, la Estaya de la Llingua, responsable de la normalización del asturianu nel conceyu, organizará delles sesiones de "bebecuentos musicales" n'escueles de preescolar los díes 21 y 22, cola intervención de l'actriz Ana Morán y del músicu miembru de La Bandina o La Bonturné David Varela.
Finalmente, estos actos tamién tresllomben el cordal cantábricu: en Llión, delles asociaciones pola defensa del llionés -como asocede col catalán y el valenciau, asturianu y llionés son glotónimos estremaos pa referise a una mesma llingua- entamen actos asemeyaos. Asina, güey les asociaciones "El Fueyu", "La Parva" y "L'Alderique" fadrán un actu d'homenaxe a la llingua llionesa, pal que cuntarán colos escolinos de los cursos de llionés qu'entamen, y el 27 de febreru colos escolinos del Colexu Antonio González Lama, pa que los más pequeños "se familiaricen cuna nuesa llingua".
