El "underground railroad", ferrocarril soterráneu, yera una organización clandestina qu'operaba nos estaos esclavistes del sur de los Estaos Xuníos a la fin del sieglu XVIII y primeros del XIX, faciendo por da-yos abellugu a los esclavos que lo pidieren, y ayudándolos a abandonar les plantaciones nes que trabayaben.
En dalgún sentíu (menos clandestinu, de xuru), la rede d'escolines que xurden alredor de l'asociación Reciella: families pol asturianu cumple una función asemeyada, en cuantes que crea un texíu formativu, arriquecedor y lliberador.
Agora, la Escolina de Carreño ta acabante d'abrir les puertes por cuartu añu.
Esta Escolina cuenta con delles families venceyaes a ella y con dos profesores, Ana y Elena, que ponen escuela nel colexu Poeta Antón de Candás un día a la selmana pa los neñes y neños de les families de Reciella. Esta Escolina foi la segunda n'empezar el so funcionamientu depués de la de Xixón, allá por 2015, y la so permanencia ye una bona muestra del interés creciente que hai na sociedá pola llingua asturiana. Non namás por conservala como si fore un oxetu estrañu del pasáu, sinón por emplegala día tres día.
La escolina candasina nació, amás, con una doble intención: per un llau, por supuestu, enllenar esi güecu na educación n'asturianu que supón la educación pre-infantil non obligatoria; per otru, tamién, integrase na bayurosa actividá cultural n'asturianu del conceyu pente medies de talleres musicales y teatrales, conciertos y cuentacuentos.
