Nel procesu de recuperación de les cellebraciones tradicionales venceyaes al antroxu y a les mazcaraes d'iviernu, que tien llugar dende hai dellos años y permitiónos esfrutar los aguilandeiros de Villapañada, los sidros de Valdesoto o os reises de Valledor, tienen un importante papel les vieyes y vieyos. Ellos son depositarios del caudal de la tradición popular, y tamién un suxetu que se reivindica como creador y receptor d'una cultura. Poro, l'esperimentu de acompañar a la comparsa d'aguilandeiros pelos pueblos de Grau resulta especialmente emocionante cuando ún puede ver a les persones que vivienon esi tipu de práctiques na so mocedá viviles de nuevu con más d'ochenta años.
Sicasí, tampoco nun se puede escaecer la tresmisión de la mázcara. Nesi sen, los mazcaritos d'Uviéu y los zamarrones de Llena desendolquen un llabor exemplar, como vemos estos díes. Los mazcaritos hai dellos años recuperanon la tradición de la mazcarada urbana que podemos topar en pintures como "Mazcarada d'Uviéu", d'Evaristo Valle, pintáu en 1928 y espuesto nel Muséu de Belles Artes. Según rellata Ánxel Nava, ún de los sos organizadores, a "Escolinos", la intención yera "recuperar l'antroxu tradicional, que llevaba 80 años perdíu na ciudá d'Uviéu", pero faciendo qu'aportara tamién a los neños, "d'una manera tala que se conectaren güelos y nietos".
Esa foi la razón pola que, amás de correr l'antroxu amarutaos como vieyes destrozones, como madamos y madames o como zíngaros col osu, los organizadores de los mazcaritos d'Uviéu faen cada añu una comparsa infantil. Asina, el pasáu llunes llarderu les críes --había una gran mayoría de neñes- d'ente 5 y 12 años qu'asina lo quixenon tuvienon un taller xunta Ánxel Nava, nel so Paraíso Local Creativo, demientres el que "escoyenon el personaxe, construyénonlu, y fixenon la mázcara". Depués, pela tarde, la comparsa de peligrosos y pequeños seres demoníacos salió peles cais del centru de la ciudá, y foi pidiendo'l so particular aguinaldu peles tiendes de llambiotaes, pa rematar el día con una chocolatada nel pub El Paragües, na plaza del mesmu nome.
Otra manera, na Pola de Llena -onde hai, por cierto, una interesante esposición de semeyes al rodiu del antroxu feches por Iván G. Fernández- fonon los zamarrones los encargaos d'apurri-y la tradición a la reciella. Asina, Susana, mayestra d'asturianu nel CP Jesús Neira, en collaboración cola dirección del centru, propunxo al alumnáu de cuartu de primaria la posibilidá de correr l'antroxu'l día 28 de febreru con traxes fechos por los propios escolinos.
