Cuando aconceyo delantre del IES Fleming con María José Ríos Lopez, filósofa y profesora de PMAR, y con Carmela Fernández García, profesora d'asturianu, percibo yá la primera estrañeza que trescala la vida nesi institutu públicu del centru d'Uviéu: que ye ún y dos al empar (y cuasi tres). Desplícome. L'alumnáu de Secundaria que da clase ehí ha dividise ente tres edificios, ún d'ellos "l'hestóricu", asitiáu na cai Trece roses, y los otros dos xunta'l colexu Baudilio Arce, frente al Calatrava. Asina, el profesoráu anda aforfugao, a la carrera ente los edificios estremaos, como si viviera de contino nun simulacru de quema; lo cual, per otru llau, paez una bona definición de la edá adulta.
En cierta manera, esta división diz daqué sobre'l calter del mesmu institutu, onde nun hebo un siguimientu masivu per parte del profesoráu de la fuelga feminista del 8-M, pero sí hebo una bona acoyida per parte de les alumnes. Nesto tien muncho que ver el PLEI (Plan de llectura, escritura ya investigación), que coordinen Carmela y María José. Según cuenten elles, qu'a les veces se ven a sí mesmes como'l "llaneru solitariu", pente medies d'esti plan organícense, siempre de forma billingüe, actividaes qu'estimulen el calter críticu de les escolines y escolinos.
Asina, rellata Carmela a Escolinos, aportó al 8-M cuasi ensin aliendu, porque venía d'entamar un concursu mui prestosu pol Día de les Llingües Maternes nomáu "L'axuntanza". Sicasí, eso nun torgó la participación del so alumnáu d'asturianu nes actividaes venceyaes al Día de la Muyer, como la producción de cartelos feministas, la reflexón sobre los mupis (esos soportes publicitarios que topamos pela cai) que punxo'l conceyu d'Uviéu, etc.
Los vedeles dícen-y a Carmela que siempre anda espetada pelos pasiellos, pegando cartelos o poniendo urnes pa que los escolinos introduzan les sos collaboraciones lliteraries. Eso ye, según María José, porque les dos tán fixes de que la educación tien de salir del aula, y los pasiellos, caro, son los qu'empobinen de les clases a la cai. Cualesquier efeméride, eventu o día especial val pa venceyalo a la educación y, sobre manera, a la educación n'asturianu. Asina asocedió en payares, cola so reflexión alredor de la violencia doméstica, o en San Valentín, cuando editaren una antoloxía billingüe de poemes d'amor, y asina va asoceder el próximu 21 de marzu, Día Internacional de la Poesía, pol qu'editarán otra antoloxía pa los escolinos.
Enantes de marchar, Carmela y María osé comenten ente elles que'l 8 de marzu topanon, na manifestación de Xixón, a delles exalumnes teniendo por pancartes feministes. Eso, atalanten, ye que daqué tán faciendo bien.
