Esta es la intervención que Berta Piñán no pudo leer en asturiano en la Junta

Señoríes, ye un privilexu dirixime a esta cámara que representa al pueblu asturianu y por eso voi falar dende la esperiencia, pero principalmente dende'l corazón. Quiero empezar contándo-yos que les palabres que más vengo repitiendo nes últimes selmanes son "Cómo dicir que non". Esa ye la mio rempuesta cuando me pregunten. Cómo dicir que non cuando tantes veces espunximos qué se podía facer cola cultura asturiana, col nuestru inmensu patrimoniu, col turismu, col arte, cola industria lliteraria, cola inclusión y la igualdá nel deporte, cola defensa del asturianu, cola imaxe que queremos tresmistir dientro y fuera d'Asturies. Cómo dicir que non a la confianza dada, y nun aceptar la oportunidá de trabayar cola honestidá per delantre nesta recuperada Conseyería de Cultura, Política Llingüística y Turismu, llevantando un proyectu ilusionante pa los próximos cuatro años sobre cuatro pegoyos firmes como son la igualdá, la inclusión, la sostenibilidá y la eficiencia.

Soi escritora, académica de la llingua asturiana y llevo bona parte de la mio vida dedicada a la enseñanza. Dende ehí, dende lo que soi, quiero empezar a falar güei, porque un aula ye un espaciu de pactu permanente, de diálogu, de consensu; ye un sitiu físicu y simbólicu, onde escuchar y comprender ye lo más importante. Ellí cabe tola diversidá del mundu, y la empatía y la solidaridá son los principios básicos del conocimientu. Señoríes, vengo de tratar col material más sensible, delicáu y valiosu que dalquién pueda tener ente les manes: los nuestros y les nuestres adolescentes. Vengo, en resume, del pactu diariu, del diálogu, de la escucha, del apueste pol nuestru porvenir.

Tamién vengo de los llibros, del cine, del arte, de la música, del teatru. A través d'ello construí la mio sensibilidá, medré como ser humanu y arriquecí la mio forma de ver y sentir. Por eso puedo poneme na piel de les persones qu'enfoten la so vida na creación. Cómo dicir que non, polo tanto, si yo soi como ellos y elles, y sé lo que ye robar tiempu a les hores de descansu pa siguir el suañu de crear. Cómo nun poneme na piel de quien fai de la creación el motor de la so vida, apostando amás por esti requexu del mundu, a sabiendes de que l'arte pue tresformar la nuestra visión de la realidá, faciéndonos ciudadanos y ciudadanes más crítiques, responsables y xustes.

Vengo de la inmensa biblioteca del mundu, como diría Borges, pero tamién vengo de l'aldea, del llaviegu, del horru, de los xunos a la herba, del ríu, de les cabañes y mayaes, del iviernu nos puertos. Y sí, claro, vengo tamién de la era dixital, del ecoloxismu, de la militancia feminista, de les lluches pola igualdá, pola diversidá, pol respetu de los derechos fundamentales. Esa ye la mio biografía emocional y política. Dende esi bagaxe, vengo con ilusión a trabayar pola meyor Asturies. Por una Asturies que supere'l desencantu y l'apatía, que recupere la so autoestima pa presentase con tolo que puede aportar, que ye muncho. Y quiero agradecer al presidente Adrián Barbón la so confianza na mio persona pa encargame de la Conseyería de Cultura, Política Llingüística y Turismu. Güei, señoríes, vengo a presentame delantre d'ustedes, con humildá y siendo consciente de la inmensa responsabilidá qu'asumo, afrontando esti gran retu na compañía d'un equipu magníficu de muyeres y homes comprometíos con esti inagotable proyectu que se llama Asturies. Son xestores, escritores, deportistes, profesores de reconocíu prestixu y, depués d'esti pasu pel Gobiernu, van siguir siéndolo. Persones con vocación de serviciu nes que tengo plena confianza, toes d'amplia y impecable trayectoria, y a les que quiero agradecer públicamente que, faciendo un paréntesis nes sos vides, aceptaren sumase a esti proyectu común. Nun puedo tar más arguyosa d'esti equipu pola so cualificación y ilusión, pero tamién de la so composición paritaria. Porque sé de sobra cuánto nos cuesta tovía güei a les muyeres desprendenos de la responsabilidá de los cuidaos p'asumir responsabilides polítiques como esta; lo difícil que ye apartar la presión que supón sobre les nuestres vides la posibilidá de nun ser bones madres o les meyores fíes. Si l'escenariu públicu ta naturalizáu como masculín, si arrastramos una historia d'invisibilidá, y si dar un pasu alantre supón munches veces asumir dobles o triples xornaes de trabayu, cómo dicir que non a un gobiernu paritariu que tien nel so corazón interiorizada la igualdá. Como dicíamos de chiques na escuela: acuto por min y poles mios compañeres.

Dicho esto, voi comenzar a fala-yos del proyectu col qu'esti equipu aporta pa los próximos cuatro años, empezando pola estaya deportiva. Dende esta Conseyería entendemos el desarrollu de l'actividá física y del deporte como una ferramienta pa prevenir enfermedaes y meyorar la salú pero tamién lu entendemos na so dimensión lúdica. Y equí queremos facer especial énfasis sobre'l deporte esfrutáu en familia, qu'estreche los llazos afectivos y promueva la educación en valores.

L'ámbitu primeru d'implantación son los centros d'enseñanza, un contestu estratéxicu pal que val d'exemplu'l Programa Rede de Centros Escolares Promotores de l'Actividá Física y Salú que dende 2018 facilita'l crecimientu personal y el desarrollu social al traviés d'actividaes lúdico-deportives, promoviendo estilos de vida saludables. A partir d'esti modelu, vamos diseñar un plan pa potenciar valores como la igualdá de xéneru, la integración, la cooperación y el fair-play n'estrecha collaboración coles conseyeríes de Salú y Educación.

Del mesmu mou, vamos esparder el nuestru compromisu firme al fomentu y puxu del deporte base, del aficionáu y del universitariu. Pa ello, vamos desarrollar programes cola Universidá d'Uviéu y vamos afianzar los programes de tecnificación deportiva de titularidá autonómica (anguaño natación, piragüismu y béisbol) qu'esta temporada va acoyer a 37 deportistes consideraos d'altu rendimientu a los que queremos da-yos facilidades nel ámbitu académicu y llaboral.

Tamién vamos trabayar nuna política educativa y integradora dirixida a la inserción social de les persones con discapacidá contribuyendo, como nun podía ser d'otra manera, a combatir el dopaxe, el racismu, la LGTBfobia, el machismu y cualquier tipu de discriminación y de violencia nel deporte al través de programes de concienciación.

Por eso ye tan importante la formación especializada de les persones que trabayen nel ámbitu deportivu de la discapacidá planificando actividades inclusives y comprometiéndonos a facilitar accesos que vayan eliminando barreres arquitectóniques y sociales. Resúltanos imprescindible proponer protocolos d'actuación en materia de prevención de la violencia n'eventos y espectáculos deportivos.

Una de les apuestes d'esti equipu tien que ver cola valoración, protección y el desarrollu del deporte tradicional asturianu, ente les que podemos destacar les distintes modalidaes de bolos, cola fin de sofitar y mantener les tradiciones deportives del Principáu d'Asturies. Comprometémonos a dedicar el nuesu esfuerzu a estudiar los problemes que padez esta práctica deportiva y a buscar soluciones de futuru.

Nesta llinia, vamos colaborar tamién nel desarrollu turísticu deportivu, especialmente nes zones rurales, entendiendo'l deporte como un sector emerxente pal desarrollu rural, contribuyendo asina a arriquecer les zones que sufren despoblación y comprometémonos a estudiar y sofitar les maneres d'ayudar al fomentu d'actividaes y programes deportivos.

N'otru orden de coses, y dada la so importancia, pueden tener por seguro que vamos impulsar les actuaciones necesaries pa la modernización de los equipamientos nes instalaciones dependientes del Principáu d'Asturies y vamos llanzar ensin demora l'anteproyectu de Llei d'Actividá Física y Deporte del Principáu d'Asturies, manteniendo como principal característica'l reconocimientu del deporte como un derechu que se desarrolla en base a cuatro pilares: prevención, educación y cultura; cohesión social; sostenibilidá y viabilidá; y impulsu económicu. Amás, gustaríanos treslladar a otros escenarios la participación voluntaria qu'existe nel ámbitu deportivu y que constitúi ún de los sos recursos más valiosos.

Como dicía enantes, los pegoyos que van vertebrar el proyectu d'esta Conseyería son la igualdá, la inclusión, la sostenibilidá y la eficacia. Nesi sen, gustaríame destacar la especial relevancia qu'esti Gobiernu quixo dar nesta llexislatura a la Política Llingüística, faciendo que figurara'l nome na denominación de la Conseyería. Nun ye namás una vistosa etiqueta. Somos sabedores de que nesta cámara ye onde se va decidir la oficialidá de la llingua asturiana, por consensu de los diferentes grupos que la integren. Pero tamién somos conscientes de qu'ún de los compromisos electorales del partíu que gobierna foi'l d'abordar el debate sobre la reforma del Estatutu y, polo tanto, de la reconocencia oficial de la llingua asturiana" y del gallego-asturianu nel so ámbitu. Dientro d'esi compromisu vamos trabayar nuna propuesta de modelu d'oficialidá, realista, acordies cola situación sociollingüística asturiana y coles necesidaes culturales. Un modelu que se caracterice pola protección y la non imperatividá, que se construya sobre l'alcuerdu y el consensu. Un modelu d'aplicación progresiva, que promueva actitúes positives hacia l'usu social d'esta llingua que ye patrimoniu cultural d'Asturies, herencia de la nuesa historia que tenemos que curiar y protexer, pero que ye tamién, pa una parte significativa de la sociedá, la ferramienta de comunicación cotidiana y de creación cultural.

Mientres llega esi momentu el marcu llegal que guía los nuesos pasos nesta materia son l'Estatutu d'Autonomía p'Asturies, la Llei d'usu y promoción del bable/asturianu, aprobada por esta cámara col votu favorable de tolos partíos políticos, y la Carta Europea de Llingües Minoritaries o Rexonales, onde figura l'asturianu como oxetu de protección.

Queremos empezar creando un Conseyu Asesor de Política Llingüística, que pondremos en marcha nos próximos meses, y que pretendemos que seya representativu de la sociedá asturiana; tamién vamos mantener y reforzar el trabayu de la Xunta Asesora de Toponimia del Principáu d'Asturies, cola qu'esperamos completar nesta llexislatura l'estudiu y la revisión de la toponimia tradicional, avanzando nel so usu alministrativu y na difusión cartográfica.

Dende la tresversalidá, yá tamos poniendo en marcha la creación de sendes comisiones permanentes nes que participen la nuesa Conseyería, la d'Educación y la de Ciencia, Tecnoloxía y Anovación, que s'ocupen de la coordinación de les materies referentes al ámbitu educativu y científicu. Ye'l nuesu compromisu trabayar pa llograr la Especialidá Docente pal asturianu y promover la formación del funcionariáu, de manera voluntaria, asina como culminar la tramitación de les certificaciones correspondiente nos niveles de conocimientu de la llingua asturiana dientro del Marcu Común Européu de Referencia de les Llingües.

Asinamesmo, queremos qu'esta seya la llexislatura qu'asiente l'asturianu como una más de les llingües del mundu online, completando los procesos de normalización dixital y d'implantación en traductores, buscadores y ferramientes de la rede. Queremos reforzar la nuesa collaboración colos órganos consultivos y asesores que nos señala la llei, especialmente cola Universidá d'Uviéu y cola Academia de la Llingua Asturiana, cola que yá nos reunimos pa una primer toma de contactu que nos permitiera evaluar y facer frente a les sos necesidaes.

Valoramos mui positivamente'l trabayu fechu hasta agora polos medios de comunicación de titularidá pública d'Asturies, que contribúin a promover y difundir la llingua asturiana ente la sociedá, con bonos resultaos de calidá y d'aceptación. Queremos que la RTPA siga nesa llinia, pero también queremos dar un impulsu más a la presencia del asturianu nesi mediu hasta algamar una programación con un usu normalizáu n'informativos, magacines, retresmisiones deportives o doblaxe de producciones estranxeres.

Como dixi a lo primero, vamos trabayar en favor d'enanchar esi consensu positivu que queremos xenerar alredor del asturianu y de la so cultura. Y nesto, resulta esencial la relación que queremos tener colos conceyos asturianos, esa parte de l'alministración que más cerca ta de la sociedá. Teniendo en cuenta les particularidaes sociollingüístiques de cada territoriu y comarca, vamos meyorar la colaboración ente entidaes locales y el Gobiernu estudiando la fórmula de convenios pa homologar el trabayu de les Oficines de Normalización. Quiero terminar esti apartáu dedicáu a la política llingüística, espresando'l mio compromisu personal y políticu por trabayar pola dignificación en tolos ámbitos de la llingua asturiana. Quiero que l'asturianu, amás de la ferramienta de comunicación y de creación cultural que yá ye, seya tamién un distintivu que nos identifique como comunidá, una sigularidá que podamos ofrecer a quien nos visite. Y nesa llinia vamos a trabayar nos cuatro años vinientes.

Señoríes: consolidar la imaxe d'Asturies como paraísu natural, pero tamién como paraísu de la creación intelectual y artística y reforzar con ello la identidá de nueso y los valores a ella asociaos, oblíganos a favorecer el desarrollu de la creatividá en tolos sectores de la creación cultural asturiana, apoyando a creadores y industries culturales con criterios que faigan posible la sostenibilidá del sector y el desarrollu de carreres personales a llargu plazu, favoreciendo la creación d'estructures y procesos sostenibles y buscando la profesionalización, y non la subvencionalización, de los nuesos colectivos. Apoyar la creación artística y intelectual d'Asturies ye conformar un relatu cultural contemporáneu y seductor, qu'amuese la variedá de la nuesa creación en tolos ámbitos y que seya quien pa proxectase dientro y fuera de les nuestres fronteres.

Ye verdá que promover la cultura en toles sos manifestaciones ye la nuestra responsabilidá primera, pero nun lo ye menos qu'esta responsabilidá ta xunida a responsabilidá conxunta y ineludible con un desarrollu sostenible. L'Axenda 2030, iniciativa de Naciones Uníes rubricada por España xunta otros 192 estaos, concrétase en 17 Oxetivos de Desarrollu Sostenible qu'han de vertebrar cualquier acción de les alministraciones y implicar tamién al texíu empresarial y a la sociedá civil. Por eso, nesta llexislatura, dende esti Gobiernu y esta Conseyería proponémonos prestar especial atención a la sostenibilidá, tanto na teoría como na práctica, apoyando con determinación aquellos proyectos de creación contemporánea que tengan que ver cola marca d'una Asturies sostenible y que nos encaminen a convertinos nun referente mundial sobre sostenibilidá.

Nel mesmu camín, vamos continuar col esfuerzu por establecer procedimientos cada vez más claros y tresparentes pa xestionar los apoyos públicos a iniciatives privaes, y promover criterios d'igualdá en tolos ámbitos de la xestión cultural según manda la Llei y el Plan d'Igualdá, velando porque les instituciones y organismos dependientes d'esta conseyería cumplan col espíritu y la práctica de la paridá, tanto respetándolo nes nuestres iniciatives como desixéndolo nos nuestros procedimientos.

Señoríes: nunes selmanes vamos presentar un proyectu cultural basáu nel entendimientu de que nun existen polítiques sectoriales eficaces si nun tan planteaes dende una perspectiva global que seya capaz d'entender ónde tamos, quiénes somos, cómo queremos mostranos al mundu. Imponse reordenar la promoción cultural asturiana, creando planes per cada área qu'incluyan la colaboración colos axentes y tamién la búsqueda activa de patrocinios externos. Queremos una cultura asturiana profesionalizada y competitiva, capaz de salir al exterior y seducir mediante'l so talentu. Y vamos fomentar la presencia de los nuesos artistes en feries como Art Beijing, o les ayudes a la traducción p'aprovechar cites como la feria de Frankfurt dedicada a España nel 2021.

Proponémonos reordenar los espacios espositivos del Principáu fomentando una mayor coordinación ente el Muséu de Belles Artes, LABoral, Niemeyer y Barjola y adaptando les sos funciones a la realidá asturiana. Entendemos que pa contribuir a la creación d'un relatu seductor d'Asturies esos equipamientos han trabayar de forma coordinada. Bona muesa d'ello, ye'l Muséu de Bellas Artes d'Asturies qu'esta mesma tarde recibe'l premiu del diariu El Comercio pola so estraordinaria trayectoria y llabor, y que conversa en diálogu fructíferu colos más relevantes museos del mundu por derechu propiu. Pa too ello, queremos trabayar mano a mano colos creadores y la Universidá d'Uviéu buscando'l compromisu de la iniciativa pública y privada, pa qu'esti gran patrimoniu que ye de tolos asturianos y asturianes pueda ser preserváu y ampliáu, y disfrutáu pola ciudadanía.

Nesi sen, ye mui importante desarrollar e impulsar los circuitos d'artes escéniques, plástiques, audovisuales y musicales, asegurando a traviés de la Orquesta Sinfónica del Principáu d'Asturies la so presencia en tol territoriu asturianu de manera que seyamos quien p'afianzar el so trabayu social y educativu. D'igual manera, ye firme'l nuestru apoyu a la Fundación Ópera de Oviedo, a quien aprovecho a mandar, col nuestru reconocimientu, un fuertísimu abrazu tres del triste fallecimientu del que fuera'l so presidente, Jaime Martínez.

No que se refier a les artes escéniques, he de dici-yos que yá nos reunimos colos representantes de la escena asturiana pa adelanta-yos la nuesa intención d'elaborar un nuevu plan específicu pal sector recuperando l'espíritu col que se creó'l Circuitu de les Artes Escéniques y pa cuya redacción queremos cuntar cola so collaboración. Del mesmu mou, queremos recuperar el Circuitu d'Artes Plástiques, y impulsar la producción cinematográfica asturiana, apoyando a les y los creadores y ampliando'l circuitu públicu d'exhibición. Dientro del trabayu fundamentalmente tresversal d'esta Conseyería, impulsaremos y desarrollaremos los equipamientos culturales de la nuesa comunidá capaces de xenerar desarrollu turísticu, un ámbitu económicu inevitablemente arreyáu a la cultura y al patrimoniu. Porque, señoríes, toi segura de que compartimos una preocupación esencial; la que se refier a la conservación y difusión del nuesu patrimonio históricu.

Ye la nuesa misión promover la conservación, el conocimientu y la difusión del patrimoniu cultural material y inmaterial d'Asturies. Y pa llevala a cabu, na presente llexislatura proponémonos facer una revisión cabal de les lleis de patrimoniu de manera que seyen más acordies cola realidá y les necesidaes d'Asturies. Nesi sentíu, préstame conta-yos que tamos acabantes de dar cursu al informe del Ministeriu de Fomento relativu a les obres d'emerxencia y consolidación del yacimientu arqueolóxicu de Chao Samartín, en Grandas de Salime, lo que ha dar un impulsu definitivu a los trabayos nesti yacimientu tan importante.

Queremos qu'esta y otres esperiencies asemeyaes nos valgan d'aprendizaxe, y por eso yá ta n'estudiu la creación d'un plan estratéxicu d'escavación y xestión de yacimientos arqueolóxicos. De la mesma manera, vamos elaborar planes y programes de xestión de los bienes culturales d'Asturies que garanticen la conservación y divulgación del patrimoniu asturianu, especialmente aquellos incluyíos na llista de Patrimoniu Mundial de la UNESCO: l'arte paleolíticu, los monumentos prerrománicos, los caminos de Santiago del Norte y la técnica constructiva de la piedra en seco. Prestaremos especial atención a patrimoniu industrial: ye urxente abordar el tratamientu d'esti patrimoniu como elementu constitutivu de la nuestra memoria histórica y de la nuestra identidá y como motor de desarrollu económicu y rexenerador de cultura nel territoriu.

Somos mui conscientes de les grandes cuestiones que tan enriba la mesa, tales como la planificación del prósimu Xacobéu 2021. Pel so llau, creemos que tres del estudiu xeomorfolóxicu y ambiental de les cinco cueves asturianes consideraes patrimoniu mundial y l'aprobación del Llibru Blancu del Prerrománicu ye necesario elaborar un plan de xestión qu'implemente les acciones. Y atendiendo a esi otru patrimoniu escondíu a la vista, ye la nuesa intención continuar los trabayos d'elaboración de la Carta Arqueolóxica Subacuática del Principáu d'Asturies en colaboración cola Comandancia Naval de Xixón.

Asinamesmo, convencíos de que'l nuestru patrimoniu etnográficu ta íntimamente xuníu al vivir cotidianu del pueblu asturianu, tamos yá trabayando nun proyectu de protección d'hórreos y paneres y nuna solución específica pa la protección de los teitos.

Como centros de referencia del patrimoniu cultural de nueso, la nuestra obligación será velar polo grandes equipamientos museísticos d'Asturies: Muséu Arqueolóxicu, Archivu Históricu y Muséu de Belles Artes. Ye un compromisu d'esta llexislatura concluir l'ampliación d'esti muséu, asina como fortalecer la so estructura orgánica y nello vamos poner tolos nuestros esfuerzos. Per otra parte, la gratuidá favorez l'accesu a la cultura en condiciones d'igualdá y la xeneración de mayor riqueza indirecta nesos entornos, por ello, vamos avanzar hacia la gratuidá de tolos equipamientos museísticos dependientes del Principáu.

Señoríes: nun se nos escapa la situación precaria de les biblioteques asturianes. La nuestra primer visita como equipu fue precisamente a la Biblioteca d'Asturies y nun fue de forma casual sinon como un compromisu simbólicu colo qu'esa institución representa y col valiosu trabayu que desarrollen les bibliotecaries y bibliotecarios pa la cultura asturiana. D'ehí que la nuestra primer intención seya modificar los procedimientos y elaborar un plan de modernización de les biblioteques d'Asturies. Los cambios nos modelos d'ociu de la sociedá contemporánea modifiquen el papel fundamental de les biblioteques como llugares d'intercambiu de conocimientu, pero en ningún casu les anulen. Asina qu'ente otres midíes vamos impulsar un Pactu Social pola Llectura.

Señoríes, ye fundamental afrontar estos retos de forma coordinada y con visión de conxunto. L'atención al detalle diariu nun puede facenos escaecer esa visión global que nos permita facenos entender pol restu del mundu, demostrando qu'Asturies ye un paraísu natural y cultural ricu en memoria y en conciencia crítica, nuna mirada abierta al futuru y bien inclada nel pasáu de la so memoria.

Estos díes (llevamos tan poco nel gobiernu que too pasa estos díes), cuando los alcaldes y alcaldeses d'un o d'otru signu nos treslladaron les sos preocupaciones y les sos ambiciones pa facer meyor la vida nos sos conceyos; cuando nos tresmiten l'interés por arreglar el teyáu de la capiella, por rozar el camín de la fonte, cuando quieren arreglar el polideportivu, facer xornaes gastronómiques, trazar rutes d'interés turísticu, meter internet nes aldees y tantes otres coses, cada entrevista ye tamién un diálogu con esa Asturies viva, audaz, con esa Asturies que siempre foi quien pa remontar les dificultaes apostando pol futuru. Y yo creo con elles y con ellos nesa fuerza y nesa capacidá inagotable de la meyor Asturies.

Esto llévame a fala-yos d'una parte fundamental d'esta Conseyería y vital p'Asturies como ye'l turismu, espeyu que reflexa la imaxe de lo que somos énte los demás pero tamién énte nós mesmos, y por ello tien que representar la estraordinaria riqueza del nuestru territoriu y de les persones que lu habitamos, cola nuestra peculiar manera de sentir, de mirar, de cuntanos y espresanos, la nuestra manera de rellacionanos y ser acoyedores coles persones que vienen de fuera. El turismu, señoríes, ye un sector fundamental pal porvenir de la nuestra comunidá y eso creo que nun se-y escapa a naide. Somos un país estraordinariamente ricu en patrimoniu material y inmaterial. Esi valor incalculable que se representa nel nuestru Arte Perrománicu nel so diálogu estraordinariu de cantiles, montes y playes, la gastronomía, la cultura minera de los nuestros valles, el nuestru idioma, el patrimoniu industrial, les nuestres tradiciones ancestrales nes canciones y bailles antiguos o nes manifestaciones artístiques contemporánees, eso ye lo que somos énte'l mundu y por ello, el nuestru proyectu de turismu dialoga íntimamente col deporte, cola política llingüística, cola promoción cultural y el patrimoniu.

El turismu ye un sector económicu estratéxicu y una de les árees más dinámiques de la economía de la nuestra comunidá. La creación d'una Viceconseyería vien a refrendar l'apueste indiscutible d'esti Gobiernu pol turismu como motor de desarrollu y de bienestar. El turismu debe ser una palanca de desarrollu sostenible del territoriu, que contribuya a afitar población nel mediu rural y preservar los sos valores, a redistribuir la riqueza y la prosperidá, a protexer y difundir el nuestru patrimoniu.

Los últimos datos del Institutu Nacional d'Estadística amuesen que tamos en condiciones de volver esfrutar d'un añu históricu pal turismu n'Asturies, diendo los datos penriba de los de 2017 y de 2018. Igualmente, la contribución del sector a la riqueza d'Asturies ye más que reseñable, pasando los 2.000 millones d'euros, con un efectu sobre l'emplegu cada vez mayor, que pasa de los 40.000 puestos de trabayu.

Nesti marcu, debemos señalar los principios xenerales sobre los que deben pivotar les nuestres acciones: sostenibilidá, capacidá de desestacionalización, l'equilibriu ente territorios: urbanos y rurales, costeros y interiores, y la internacionalización. Y el nuestru principal oxetivu va ser siguir afitando la imaxe d'Asturies como paraísu natural, reforzando la identidá y valores que lleva arreyaos. Nesti sentíu, va ser fundamental consolidar los nuestros productos turísticos estratéxicos y prioritarios, y reforzar la nuestra cartera con productos nuevos de cabecera.

Pero nun debemos midir l'éxitu del modelu turísticu esclusivamente pel aumentu del númberu de turistes, sinon buscar un modelu más rentable, más sostenible onde prime la calidá, como elementu diferenciador. Debemos mantener la identidá, fomentar la redistribución de fluxos turísticos y evitar la distribución desigual de los beneficios.

La implementación de la intelixencia turística y la dixitalización son tamién oxetivos irrenunciables d'esta Conseyería. Vamos avanzar na construcción d'un territoriu, dotáu d'un sistema d'intelixencia que capte, analice y comprienda los acontecimientos en tiempu real acordies colos pasos ya daos al formar parte de la Rede Estatal de Destinos Intelixentes. Gobernanza, conectividá, movilidá, accesibilidá (física y dixital) serán dalgunes de les nuestres llinies estratéxiques, de forma qu'incrementemos la collaboración cola alministración local, y les llinies d'ayuda a pymes turístiques pa sofitar la modernización y remodelación de los establecimientos turísticos, especialmente nos aspectos tecnolóxicos, de comercialización y d'eficiencia enerxética.

Señoríes: Asturies cuenta con cuatro marques de calidá: Casones Asturianes, la nuestra marca pionera, hai yá 25 años; Aldees, Asturies calidá rural; Meses d'Asturies, escelencia gastronómica y sidreríes d'Asturies, calidá natural, la última en ser desarrollada nel añu 2016. Marques coles que queremos renovar el nuestru compromisu, da-yos mayor puxu y crear nuevos referenciales venceyaos a la sostenibilidá.

Otru de los nuestros oxetivos va ser reforzar les sinerxes ente cultura y turismu, puxando y promocionando los equipamientos culturales y deportivos de la nuestra comunidá capaces de xenerar desarrollu turísticu, fortaleciendo la recuperación del patrimoniu cultural al serviciu de l'actividá turística, siguiendo exemplos tan exitosos como'l Parador de Courias.

Mención aparte merez el Camín de Santiago al que yá me referí en delles ocasiones nesta comparecencia: un productu singular, únicu y diferenciador, con una gran capacidá de posicionamientu a nivel nacional y internacional. Cola perspectiva del Xacobéu 2021, queremos desarrollar un programa específicu, potenciando tanto'l camín de la costa como'l camín primitivu, buscando que la llexítima fortaleza turística del norte siga medrando.

Nun horizonte más ampliu, alliniáu cola Estratexa de Turismu Sostenible d'España 2030, queremos reforzar la posición del sector turísticu n'Asturies a través d'un programa estratéxicu nuevu, basáu na sostenibilidá y la implementación de la intelixencia turística y la dixitalización, pal que vamos buscar la participación de tolos axentes implicaos nel fenómenu turísticu. Porque aspiramos a contar con un documentu que nos permita pilotar la siguiente década dende la proximidá y la complicidá col sector, y pa ello queremos promover una gran alianza del sector turísticu, basada na participación y na cooperación.

Nesti puntu, correspuende falar o destacar el trabayu más calláu pero imprescindible que se fai en materia d'ordenación, disciplina y inspección del sector turísticu. Ye fundamental pa mantener los estándares de calidá, tener un mercáu turísticu perfectamente reguláu y reforzar los llabores d'inspección talo como nos obliga l'incrementu de viviendes d'usu turísticu y viviendes vacacionales. Tenemos qu'abordar la ellaboración de una llei de turismu nueva, revisando l'actual llei 7/2001 y adaptándola a les realidaes renovaes del sector.

Ampliu ye'l conteníu de la Conseyería que tengo l'honor d'encabezar, señoríes. Y mayor tovía la so importancia. Sé qu'ustedes van preguntame agora coses que sabré contestar con mayor o menor aciertu. Pero lo importante nun va a ser lo qu'acierte o non a contestar depués de dos meses al frente d'esta conseyería, sinón de la mio capacidá pa incorporar les sos preguntes, en saliendo d'equí, a la mio visión de les inquietúes, los problemes y les circunstancies qu'afecten a la cultura asturiana pa qu'ente toos y toes atopemos respuestes. Porque ustedes, señoríes, na so diversidá, representen al pueblu asturianu y yo débome a ello. Y como a toos nos xune esta voluntá de nun dicir que non y la convicción de que vamos facer tolo que sía posible por meyorar el presente y el porvenir de la nuestra tierra y de los nuestros vecinos y vecines, permítanme que-yos pida confianza, complicidá, collaboración, escucha y diálogu. Pela mio parte y pela parte del equipu que m'acompaña nesti proyectu, puedo garantiza-yos llabor y collaboración. Por eso, nel deséu de falar, alcordar y construyir xuntos, nunca-yos diremos que non. Asturies merez la nuestra dedicación, el nuestru respetu y munchu trabayu.

Dicen unos versos de la poeta Mary Oliver que "toles idees importantes deberíen incluyir a los árboles, los montes y los ríos". Asturies tien de too ello n'abondancia. Munches gracies.