La Nueva España

La Nueva España

Contenido exclusivo para suscriptores digitales

Esti Güevu Sal Quier

Pigazos y aburrimientu

L'osu de Cangas y los teledeberes

Pigazos y aburrimientu

1 L'osu de Cangas. Siempre ye en monte. En China, pasó-y a Wang Zhi, qu'avieyó cuando diba a por madera pal mangu del hachu: durmiose viendo a dos veteranos y misteriosos xugadores de go disputar una partida inacabable; en Palestina, Honi HaMe'agel, estudiosu del Talmud, quinxo tastiá la fruta d'un algarrobu recién plantáu y, esperando, echó una siesta de setenta años; ente los alemanes, llámase Peter Klaus y entró-y un sueñu de venti primaveres de la que buscaba cabres perdíes; n'Éfeso, siete mozos convertíos a la fe de San Pablo guardáronse nuna cueva y transitaron de la Roma pagana al imperiu cristianu de Teodosio II nun pigazu beatíficu, secular; Washington Irving cuenta cómo se-y cerraron los párpagos a Rip van Winkle contemplando a unos desconocíos xugar a los bolos tamién peñes arriba y, pa cuando los abrió, llegaba-y la barba a los pies. Toos echaron un sueñu que val por una vida y, al despertar, alcontraron un mundu distintu, cambiáu.

Ente nosotros, ye l'osu de Cangas. Allá a finales de la seronda, cuando ya nun quedaben caxellos qu'asaltar, invadiólu la señardá de la cueva y enroscóse na penumbra caliza. Tres meses depués, espúrrese y el mundu ta raru. Los caminos, pelos qu'anda agora con pasu floxu, fríes tovía les articulaciones, nun arrecienden a esi omnipresente animal bípedu que tolo invade, que tolo quier pa él. Hasta paez qu'hai llicencia pa pisá los anchos, duros y secos repuelgos d'asfaltu colos que fier la tierra y pa rondar pente esos otros caxellos, monumentales pero improductivos, que llevanta del suelu pa guardase de la nueche. Ehí lu viemos estos díes, al osu de Cangas, grabáu dende una ventana, de vuelta pa la so particular Sefarad, pisando los llugares de los que la urbanización humana-y espulsó a los antepasaos munchu tiempu atrás so pena de muerte.

Esti enclaustramientu nuestru, ¿nun será, en realidá, la prisión cola que la Naturaleza nos castiga pa da-yos un tiempu de paz y recréu a los nuestros convecinos del planeta, igual que la Xusticia encarcela a los que nos roben la tranquilidá de les calles?

2 En defensa del aburrimientu. Les instrucciones publicaes el martes pola conseyería d'Educación son hasta razonables (¡mira tu!). Esmesando d'ente la inevitable palabrería administrativa, vien a decir que toos tranquilos; que nun s'agobie naide: nin alumnos, nin families, nin profes; y que naide pierda la cabeza pensando que tien que compensá les circunstancies actuales con un estresante telesfuerzu pedagóxicu. Por una vez, ún coincide cola autoridá. Y, ya puestos a tar en cuarentena, la pena ye que nun s'active, en paralelo al indeseable microriciu que nos invade'l gañote, otru virus fechu de bits que se cepille Internet, pa que los neños nun tuvieren más remediu que tar mano sobre mano, ayenos lo mesmo a los deberes qu'a los móviles. ¡Qué frenesí, qué manía la d'esta sociedá por tener siempre a los rapacinos ocupaos! ¿Cómo nun va haber hiperactivos? ¡Aburrimientu, señores, aburrimientu! L'aburrimientu ye'l motor de la creatividá. Un adolescente tumbáu na cama o en sofá, aburríu, mirando pal techu, promete una canción, un dibuxu o un poema, promesa que ta alluendi les posibilidaes d'unos míseres teledeberes.

miliorodriguezcueto.wordpress.com

Compartir el artículo

stats