Los parlamentarios asturianos de Podemos dicen que se van rebaxar el sueldu pa doná la metá en pro de necesidaes sociales, y a ún paez-y bien; piden que tolos partíos de la Xunta Xeneral apliquen la mesma medida, y a ún paez-y mal.
Pa qu'un actu tenga un componente éticu, tien que ser, esencialmente, personal. Cuando se pretende colectivizar por decretu la idea más virtuosa, caemos del llau de la moral pública, que ye cosa peligrosísima porque esclaviza a los individuos y sentencia espartacos. N'España, sabemos muncho de moral pública, muncho y de mala alcordanza. La portavoz de Podemos, Lorena Gil, que defende esta iniciativa nel parlamentu asturianu, nació l'añu qu'agonizaba'l Gran Moralista y, igual por eso, nun acaba d'entender qué feo ye deci-y a la xente lo que tien que facer en cuestiones que van alluendi los impuestos y les lleis. Una pista: la imposición del propiu credo a los demás ye atributu fundamental de lo que siempre s'entendió por "facha". Promociónese'l grupu parlamentariu que quiera con xestos solidarios y dexe que les otres sigles se faigan les bobes, si-yos apetez, que son toos mayorinos.
A ún gústa-y menos tovía la manera que tuvo Lorena Gil d'espresase respecto a esti asuntu cuando la Xunta Xeneral aplazó debatilu por nun figurar nel orde del día. "Los partidos siempre encuentran una excusa para ampliar sus privilegios, pero en este momento excepcional la sociedad no les perdonaría que sigan pensando en su beneficio particular." Estes declaraciones puede firmales, y aplaudiendo con entusiasmu, la directiva de Vox. Oyéndoles, ún puede pensar que'l "target" electoral de Podemos y Vox fuere'l mesmu: esi votante encabronáu que, arrenegando de la clase política, arreniega, en realidá, de la democracia que nun contenta toes y caúna de les sos pretensiones, les utópiques como les realistes, les estructurales como les que son de la so esclusiva responsabilidá. "Los partíos (privilexaos) alcuentren disculpes... la sociedá nun los va perdonar", diz Lorena Gil, escluyéndose ensin derechu, de manera tramposa, d'esa categoría que describe como egoísta, insolidaria, perversa: los partíos políticos. Y, entós, lo d'ella, ¿qué ye?, ¿una cofradía de Selmana Santa?
miliorodriguezcueto.wordpress.com
