Radio y televisión. Al traviés d’estos dos conceutos, el colexu públicu Virxe de les Marees, nel barriu d’El Nodo d’Avilés, ta entamando una iniciativa audiovisual ente los más pequeños que forma parte d’un proyectu de tresformamientu del centru. “Soi un convencíu de que lo audiovisual ye fundamental. Tolo que seya salise del llibru ye positivo, porque los rapazos motívense y emocionen”, esplica Daniel Ortuño, l’encargáu d’esta actividá, que tien el sofitu y l’envís del conceyu d’Avilés, la Conseyería d’Educación, la Universidá d’Uviéu y l’asociación Nómades.
La cara visible d’esti proyectu, según comenta Ortuño, ye’l programa “Radiovisor”. En caún participen dellos collaboradores y tres neños. El postreru que fixeron trató sobre la pintura y participaron moces del propiu centru d’El Nodo, del colexu de Sabugo y del de La Toba. Mientres el programa –el quintu desque empezó, tres la vuelta de la pandemia de coronavirus–, el presentador y comunicador Daniel Ortuño plantegó a los neños convidaos delles entrugues rellacionaes cola temática. Mientres, l’espertu en temes científiques Daniel Rivaya esplicó la ciencia qu’hai detrás de la pintura.
A base de concursos y xuegos los rapazos espansionen, pero, sobremanera, aprienden. Aprienden sobre les asignatures que nesi momentu tean dando en clase y, amás, trabayen les sos habilidaes comunicatives de forma oral. “Toi convencíu del poder d’enseñanza que tien la televisión”, reconoz Ortuño. El programa ta guionizáu pol hermanu de Daniel, David Ortuño, el so collaborador de confianza. Fáese de forma “online” y de xeitu periódicu, visto’l gran trabayu que trai la edición posterior, qu’en dellos casos lleva más p’allá de les ocho hores. El siguiente programa que van facer yá tien temática: la Navidá.
Sicasí, anque nel “Radiovisor” –que puede siguise al traviés de la canal de YouTube del conceyu d’Avilés– los más pequeños son los protagonistes, onde más pueden caciplar ye nel programa que realicen cada dos selmanes na biblioteca del Virxe de les Marees. Sol títulu “La voz de cantares”, los pequeños diviértense, aprienden y conocen el funcionamientu d’un programa de radio. “Son ellos los que faen los guiones”, asegura Daniel Ortuño, profesor y supervisor de los rapazos. Nél pescuden sobre temes que tán viendo en clase, amplíen la información y alléguenla hasta’l programa cola enganía de comunicar al restu les sos investigaciones.
Tanto col “Radiovisor” como con “La voz de cantares”, los alumnos de Primaria del colexu públicu Virxe de les Marees siguen cola so formación audiovisual dientro del proyectu de tresformamientu del centru. L’enfotu por siguir aprendiendo, ameyorando y comunicando ye la máxima común d’esta iniciativa p’alumnos y profesores.
