Los nuevos cantares de chigre (según Rodrigo Cuevas)

Cuando-y propunxi a Rodrigo escribir un llibru daqué asemeyáu a esti, dímonos cuenta de que nun yera abondo con rastrexar y esbillar los cantares de chigre que pueden facer un nuevu canon pa cantar nes sidreríes, sinón que lo suyo yera afilvanar un rellatu que los xunciere toos y que dotare d’un sentíu mayor a la escoyeta. La xorda, al cabu y al fin, ye daqué mui serio, y pa falar d’ella ha facese en facha. Poro, nel llibru van poder topase una serie de cantares propuestos pa la xorda del presente y del futuru, pero tamién una manera d’enrestralos y, a la fin, d’inscribilos na vida de caún.

Nel branu de 2023 y a lo llargo de delles sesiones, xuntémonos Rodrigo y yo na so casa piloñesa pa reflexonar sobre esta escoyaza de canciones. Compartimos gustos y disgustos —que tamién de noxu ta fechu l’arte— p’acabar llegando a esti fexe de cantares, y caún d’ellos escoyóse específicamente pa reflexar los tiempos estremaos del xaréu. Dalgunos proceden d’álbumes de grupos de pop; otros son tradicionales o estrayíos del repertoriu de la tonada asturiana; y hasta dalgún ye’l resultáu de les grabaciones de chigre que fixo Rodrigo y que dieron llugar a mezcolances (medleys) bien interesantes, que reflexen esi momentu d’intensa creatividá ya improvisación que namás ye posible en metá de la xorda. D’otra manera, los comentarios qu’acompañen a los cantares son frutu de les conversaciones que tuviemos alredor de la mesa, mentes tomábemos café y falábemos d’otros temes que mos apasionen, como los semilleros de berza o la toponimia menor.

Asina, garremos de Barthes el conceptu de figura ("rabaseres del llinguaxe que-y sobrevienen al arbitriu de circunstancies ínfimes, aleatories") pa imaxinar los momentos estremaos d’una nueche de folixa, na que’l suxetu de la xorda celébrala y celébrase cantando. Nes páxines del llibru van poder topase los sos cantares xunta la reconstrucción d’estes hores, con un suxetu-cantante qu’enuncia esta xorda en primera persona, dende la pulsión del aniciu, que lu arrumba y lu arrastra, a l’arrancadera y el vacíu que queda depués. Cada llector tendrá qu’adaptar esti percorríu nocherniegu a les sos propies necesidaes y gustos: anque l’orde ye daqué zarráu, podrá dir saltando les figures que nun-y interesen y pa les que la nueche concreta nun s’ofreza, cuasi como nun llibru d’Escueyi la to propia aventura.

04.00. PLENITÚ XUBILOSA (EL PLACER DE LOS NOMES)

"Baxando yo pela aldea" (Trad. / Marcelina Cuesta "Nachón")

El placer de dicir los nomes de los coses. Hai un placer na precisión. Equí dicen: "Yá nació la rama’l roble, / yá floreció la espinera / yá se pueden dir casando / los mozos de Caperea". Los nomes individualicen un momentu específicu nel tiempu. Hai un fardar de conocimientu: la xente del pueblu tien un conocimientu tan exhaustivu de tolo que-y arrodia que ye a facer poesía con ello. Ye una exactitú tan tremenda... Ye un fardar constante. 

BAXANDO YO PELA ALDEA

TRADICIONAL / MARCELINA CUESTA "NACHÓN"

Baxando yo pela aldea
sentí un paxarín cantar 
detrás de casa Pericu,
na pica una cerezal.

¿Qué páxaru será esi,
que tien el picu amariellu?
¿Esi que llamen cuquiellu?
¿Ye familia del raitán?

Ye una delicia tar
de veranu nuna aldea,
y nuna casina d’eses 
arrodiada d’arbolea.

Y cuando sale l’aurora
y óyese al mirlu cantar;
la zarrica y el pinzón,
el veranín y el raitán.

Tamién canta la calandria,
el malvís y el verderón,
y encima un pegollu l’horru
siento chillar el gurrión.

Esi siempre canta igual
porque nun sabe otru son;
cría debaxo les teyes,
compañeru del ratón.

¿Ónde ta Pachu Pericu?
Ta allá detrás del corral,
cabruñando la guadaña
pal veranu trabayar.

Ahora vienen les andeches,
de sayar y d’arrendar, 
y comer les patatines
a la oriellina del llar.

06.00. Éstasis 2 (arrebatamientu)

"Arriba naquel montiquín" / "Trés Pedros Crespos Calvos" / "En noche lóbrega"

Hai dos formes de llegar al éstasis: pola guapura y pola llucidez. Esto últimu ye xampán poles tetes. La fragmentación tamién ye mui tradicional, axuntando coses mui estremaes, garrando d’equí y d’allá. Esa xunión de coses diferentes representa perbién la mente humana. Este paisanu taba nuna llucidez total, fragmentaria. Enfila los tres cantares como si fueren... ¡pum! 

Llego al éstasis non pola abrumación pola guapura, sinón pola diversión y el tou val. Entra la improvisación y flui. Garres trés cantares que nun tienen nada que ver, y de repente tienen tol sentíu. El primer cachu ye popular y les rimes son agudes; el segundu cachu conocémoslu por Víctor Manuel y funciona al traviés de les pallabres llanes; l’últimu cachu ye como de tuna, usando les rimes esdrúxules pa xenerar una sensación de pedantería.

Llegamos al éstasis pola risa. Divirtiendo a los demás. Siempre hai esi momentu nes xordes de canciones de risa, y el que tenga la canción de más risa trunfa. Hai que dedicar un tiempu a aprendeles, porque nun son guapes de sentir nel día a día. Una persona dedicó tiempu a aprender la canción más inxeniosa pa cantala nesi momentu, llucise y que la xente se mate de risa. Ye un sacrificiu.

ARRIBA NAQUEL MONTIQUÍN / TRÉS PEDROS CRESPOS CALVOS / EN NOCHE LÓBREGA 

MEDLEY D’UN PAISANU DE NAVA

Allá arriba naquel montiquín
había una vieya pelando un pitín. 
Y pelaba y pelaba y pelaba
y pelaba con tal disimulu
que nun-y dexaba 
una pluma nel... ala.

Carretera abaxo va
en Santo Domingo entré 
y por Pedro Crespo Calvo carpinteru pregunté.
Y me dixo una señora:
"¿Qué Pedro pregunta usté?
¿Pol d’arriba, pol d’abaxo 
o por el del arrabal?
Hai tres Pedros Crespos Calvos
carpinteros en llugar.
Hai tres Pedros Crespos Calvos 
que nun quieren trabayar, trabayar y trabayar".

En noche lóbrega, galán incógnito 
las calles sórdidas atravesó 
y bajo clásica ventana dórica
templó su cítara y así cantó:
"Luna hermosísima, de bello resplandor"...

09.00. Depués de l’arrancadera

"Las vaqueiras", María Dolores Pradera

Momentu fake. Diendo pa casa, pienso: ¿cómo nun cantamos...? Pasóme un día, tuvimos una xorda mui buena con Rozalén en Casa Oscar, en L’Infiestu. Comimos fuera, na terraza; entramos a tomar el chupitu dientro, sacamos les guitarres y diéronnos les seis de la mañana ensin parar de cantar. Llegué a casa, echéme y nun podía dormirme pensando en toles canciones que quedaran sin cantar. Tolos momentos qu’ún cree que tovía podría vivir, de los qu’esfrutar y facer esfrutar. Esto ye la evidencia de les llendes del ser humanu. El FOMO de más allá de la vida. La escala temporal del ser humanu ye qu’hai que dormir toles nueches: hai veces que ta guai, pero otros díes nun entiendo por qué. ¿Qué más-y dara al cuerpu humanu, si duerme tolos díes, un día non dormir? Esta canción ye una rareza, de la Serie rarezas de Maria Dolores, que dices tu, quedaría yo con esta canción tan bien si la cantare nuna de les figures d’antes... 

LAS VAQUEIRAS

MARÍA DOLORES PRADERA

Esti pandeiru que toco
yía de pel.lechu d’ouvecha.
Ayer berraba no monte,
güei zumba que retumbecha.
Eh.

Pabilún, pabilún, pabilún.
Si me das una peseta-eta
para pasar-asar a Payares-yares
el domingu-ingu cuando vuelva-vuelva
yo traeréte-rete unos corales.
Eh.

Tu dices que nun me quieres
porque nun soi la primera.
La flor que primeiro sale,
mia vida del alma,
primeiro l’aire la l.lieva.
Eh.

Anque voi pa la braña
nun l.lievo pena
porque l.lievo conmigo
la mia morena.

Adiós, amante, adiós, adiós,
adiós, amante, que yá me voi.
Adiós, amante, adiós, adiós,
adiós, amante, que yá me voi.

Suscríbete para seguir leyendo