¡Qué sorpresa! El "Señor de les Cuenques y Virréi d'Asturies", José Ángel Fernández Villa (Josiángel pa los sos llacayos) nun yera trigu llimpio. El xuiciu intermitente que lleva desenvolviéndose dende hai yá un tiempu contra la so persona y la so corte ta sacando a rellucir lo más cutre, xostrón y vergonzante d'una manera d'entender la política qu'actuó impúnemente a lo llargo de les últimes tres décades nesti maltratáu país llamáu Asturies. Y agora, que la figura del toupoderosu "líder sindical" esbarrumbó como la xigantesca estatua de Sadam Hussein depués de la Guerra del Golfu, los que lu conocíen, arrodiaben y adulaben arrenieguen d'él como un apestáu. Unos xiblen disimulando y otros, probinos ellos, dicen que nun sabíen nada de los sos chanchullos y enguedeyos.
Fernández Villa representa y resume en bona parte lo que foron estos más de trenta años d'autonomía asturiana, onde una persona con un poder escomanáu, absolutu, siempre presente, ponía y quitaba cargos nes empreses públiques, daba'l vistu bonu a los periodistes "amigos" y marxinaba a los díscolos, nomaba y destituyía representantes políticos y hasta bendicía a los presidentes del "Principado". Dende'l so tronu exercía'l Poder (asina, con mayúscula) nun réxime onde'l nepotismu yera la marca de la casa. Nepotismu y mieu, sí, tamién esto último, qu'exercía al traviés de la so guardia pretoriana formada por miembros del SOMA, qu'actuaben como si de matones del hampa se trataren. Que-yos lo digan sinón a aquellos insumisos que tuvieron la osadía d'interrumpir un mitin del PSOE en Xixón nuna campaña electoral. O a esti qu'escribe que, xunto a otros compañeros y compañeres, protestemos pola intervención de Gustavo Bueno (en plena engarradiella llingüística daquella) al final d'una manifestación en defensa de la minería n'Uviéu, na que tuviemos d'acabar blincando pente les sebes, bancos, papeleres y demás mobiliariu urbanu pa que nun nos garraren aquellos "sindicalistes" enraxonaos y nos "dieren una llección" por ser tan irreverentes d'interrumpir al so filósofu de cabecera.
Les males artes, proceder y funcionamientu de Villa y el so entramáu namás foi posible gracies al consentimientu, cuando non collaboración, de bona parte del psoecialismu asturianu a lo llargo de toos estos años. La connivencia y el mirar pa otru llau, el nun querer saber, yera la tónica dominante del "aparatu". Y agora, yá ensin la parafernalia de los pañuelos colloraos nel pescuezu, los puños n'alto y La Internacional sonando en Rodiezmo, ta viéndose a les clares lo qu'había detrás de too ello: impunidá, marafundiu, lladroniciu y muncha desvergüenza.
Lo llamativo del casu ye qu'esta situación yera conocida, en mayor o menor midida, públicamente y nun digamos yá nos ambientes polticos, onde unos sabíenlo a ciencia cierta y otros intuyíenlo. Hasta aquellos mocinos y mocines inxenuos a los qu'escorrieron pela plaza de La Escandalera sintiéremos qu'aquel del bigotón mandaba y (supuestamente) mangaba muncho. De Josiángel sabíemos que yera merecedor d'aplica-y la cuarta acepción del términu "villanu" según el diccionariu de l'Academia de la Llingua Asturiana, que se refier a daquién de mal carácter, agora tamos conociendo que tamién la quinta lu definía: malváu, que busca'l mal (pa los demás).
