Yá tamos en víspores d'antroxu, una de les fiestes más guapes del añu y estos díes ta nel maxín de toos nós. ¿De qué nos amazcaritamos? Quiciabes colos traxes que desearíamos vistir tol añu. Peluques, calves o sofisticaos sombreros. Antifaces y caretes, capes y abrigos cubren estos máxicos díes antroxeros el nuesu cuerpu y la nuesa alma. "Mazcaritos" que dan risa y que nos allegren el corazón. Y ye que n'Antroxu too val. Tresformámonos en personaxes bien distintos de lo que somos de "normales" na nuesa sociedá. Quiciabes nos disfrazamos de lo que, en dalgún momentu de la vida, nos prestaría ser. Amazcarámonos pa poder pasar desapercibíos per unes hores, anque'l traxe llame l'atención. Pero en realidá, lo que más cuenta son esos momentos de diversión y de llocura. Asina que bien ta tresformase per un día en gatos, bruxes, curas, monxes, homes del sacu, o cenciellamente xubir al desván a revolver y vistise con ropes vieyes, y poner un traxe de lo más estrafalario pa cambiar de personalidá y caleyar cola risa per tolos requexos. Ente menús y trapos, ente fartures y folixa, tamos n'ambiente. Yá sabéis que diz el refrán: "En tiempu d´antroxu Dios perdónalo too".
N'antroxu ye fácil facer un "nenu", y que naide piense mal, o igual ye pensar bien, porque nenos bona falta nos faen, porque ta despoblándose Asturies. Y si nun hai nenos qué va ser de nosotros. Sicasí, yo refiérome nesti casu a un dulce mui d'antroxu que se llama "el nenu" y que ta mui, pero que mui rico. Faise pola zona del occidente d'Asturies y como tola cocina tradicional ye mui cenciellu, anque, eso sí, pa too hai que tener mano. Voi escribir equí la receta por si a dalguién-y presta cocinar y endulzar estos díes antroxaos pa los llambiones, que somos casi toos. Porque ¡a quién-y amarga un dulce!
El nenu: Una barra de pan del día anterior esfaraguyao y remoyao en lleche, una docena de güevos y un cachu mantega y doce cuyaraes bien enllenes d'azucre. Too bien batío y mezclao. Échase nuna vexiga de gochu que tará curada de cuando se fai'l samartín y hai que remoyala n'augua p'ablandala enantes d' echar esti rellenu. Átase bien con un palín y filu gordu y cuezse al bañu maría unes dos hores. Si nun hai vexiga en casa, pue cocese nuna cuerna (tripa de vaca) que les vienden na carnicería, siguiendo los mesmos pasos.
Y con esta llambionada, deséovos que paséis un antroxu folixeru.
