La muerte siempre nos sorpriende. Nunca tamos dispuestos pa la partida. Magar toos nacemos pa morir, quixéramos siempre allargar el tiempu d'estancia nesti mundu, anque nos aseguren que se ta meyor nel otru, anque nos aseguren qu'al otru llau vamos alcontrar la felicidá que nesti mundu siempre pasa de raspión y nun se detién. La felicidá que nun sabemos bien lo que ye, porque ye dalgo efímero, dalgo como l'aire que nos acariña'l rostru y pasa nun tris.
Dexónos Margarita Salas. Qué pena. Inesperadamente, cuasique a puntu d'entamar la Selmana de la Ciencia en L.luarca, a la qu'ella tanto aportó. Una muyer qu'amás de tolo qu'aportó a la Ciencia, dionos exemplu de munches virtúes: humilde, xenerosa, trabayadora incansable, entregada, rigurosa? Una muyer que demostró que se pue llevar un llabor de tantu altor como ye la investigación y compaxinalu cola familia, tener una fía, alimentar l'amor y otres munches coses. Un exemplu pa esta sociedá machista, na que'l llabor de les muyeres queda por veces en segundu o tercer planu o que nin tan siquiera-y da la lluz. Margarita Salas déxanos una gran herencia pa la humanidá. Nada pue ser más grande. Una valdesana ilustre, que bebió de bones fontes de la mano de quien foi'l so asesor y maestru, Severo Ochoa, el Premiu Nobel de Valdés. Margarita teníalu tamién merecíu y, como la muerte nun espera, anque seyan inumberables los premios y reconocimientos recibíos, marchósenos ensin el nobel y ensin otros premios que-y podíemos dar en casa. Porque les muyeres siempre quedamos a la espera. Y a veces escurez enantes de lo previsto.
Seguro qu'esta gran científica alcontró munchos pilancos nel camín, y ella mesma lo denuncia: "primero fui discriminada por ser muyer y agora por ser vieya"- sentí-y dicir esta frase más d'una vez-. Qué triste. Eso ye esta sociedá, onde trunfa lo cutre, lo superfluo y onde cada vez más los mayores tán arrequexaos, despreciando la so sabiduría, anque esti nun fuera'l casu, pero si ella se quexaba, de xuru que dalgo habría, sabiendo de la so discreición.
Yo nun puedo opinar fondamente sobre'l so trabayu, eso yá lo faen los sos colegues científicos, pero sí dicir como ciudadana d'a pie, que perdimos una gran científica, que nun dexó de trabayar intensamente, que foi educadora, conseyera, maestra xenerosa de los sos discípulos, como ellos manifiesten estos díes con tristura, orguyosos y emocionaos, tresmitiéndo-yos eses virtúes qu'ella tenía, la del entusiasmu, el rigor y la entrega. Ella mesma recalcaba nes entrevistes la importancia d'entusiasmase colo qu'entamamos, nesti casu con un llabor de tanta precisión y dedicación como ye la investigación. En pallabres de la investigadora María Blasco, Direutora del Centru Nacional d'Investigaciones Oncolóxiques": "a sus alumnos nos gusta llamarnos "Margaritos". Y sí, de xuru que dexa numberosos "margaritos" a los que-yos deseamos que sigan por camín qu'ella-yos anició. Toos habíemos apropianos d'esi conseyu y entusiasmanos siempre colo qu'emprendemos. Podríemos dicir qu'eso forma parte de la felicidá. Nada más grande. Siéntome orgullosa d'esta valdesana que yá descansa nel otru llau. Una muyer que n'otros tiempos, inda más difíciles qu'agora, emprendió'l camín de la investigación, y que ye un referente pa toes nosotres. D. E. P.
