Nunca nos dimos tantos abrazos como nestos díes de zarramientu, pero son abrazos virtuales. Anque nos lleguen de quien nos tien estima, de quien nos quier, de quien nos tien presentes, anque nos allegren y nos consuelen, nun ye lo mesmo que cuando nos damos un abrazu físicu onde entran en xuegu otros llazos como'l contautu, el calor, la mirada, y más. El contautu físicu que se produz cuando nos damos un abrazu sobra dicir que ye pa nosotros fortalecedor. Los abrazos son protectores naturales contra les gafures de la vida. Un abrazu cura les mancadures, un abrazu ye un anticipu pa un momentu de felicidá. Toos esperimentamos el placer d'un abrazu. Y ye que querer y sentíse queríu, ye lo más grande que nos pue pasar.
Tantu tiempu zarraos en casa danos pa pensar y reflexonar sobre munches coses. Somos una sociedá "sobona", préstanos muncho abrazanos y besanos mui a menudu, pero, cada vez tamos más faltos d'abrazos y esa falta multiplícase cola vieyera, coles enfermedaes, cola soledá que reina na sociedá de la priesa y del egoísmu. Y quién sabe si cuando nos vayamos incorporando otra vuelta a la vida "normal" vamos tar inda más faltos d'abrazos, porque col mieu al contaxo van amenorgase los acercamientos y de xuru que vamos a mantener les distancies y namás saludanos de lloñe, por si acasu. Quien sabe si esta situación va a aumentar la soledá, la falta de comunicación y la falta de cariñu. Siempre tenemos deséu de que dalguién cercanu t'abrace, y amás nun hai qu'escaecer que la prohibición aumenta'l deséu. Tantes llaceries como nos traxo'l COVID19 y, pa dempués, sería una pena tener que dosificar dalgo tan prestoso como ye un abrazu. Nun paez sinón que tolo bueno, hai que tomalo en pequeñes dosis. Sería una pena que tuviéremos que prescindir d'esta costume que ye de lo más guapo de la humanidá.
Los abrazos meyoran l'estáu emocional, y seique protexen contra los virus y les enfermedaes. Quiciabes si'l mundu s'enllenare d'abrazos, hasta los virus se lo pensaríen enantes d'atacanos, porque nun hai dulda que los abrazos son enforma sanadores. Y yá que de momentu nun topamos otra cura, quien sabe si los abrazos contribuiríen a qu'el nuesu cuerpu reaccionara disparando les defenses. Quien sabe si esa falta d'amor, de cariñu, d'empatía nos baxa les defenses corporales. Quién sabe si l'individualismu, la soledá y la tristura nos predispón pa qu'esos seres tan pequeños y mortíferos nos invadan y pase lo que ta pasando. Quien nun recibe abrazos, enferma del alma.
Según dalgunos espertos, ta demostrao qu'un abrazu sinceru, un abrazu con bon aquel dispara los niveles d'oxitocina (hormona del amor). Amor, munchu amor ye lo que más necesitamos na vida y más en momentos difíciles como'l que tamos atravesando. Nun podemos olvidar que non solo tenemos que curar les enfermedaes del cuerpu, tamién tenemos que sanar l'alma.
Pero dende esti zarramientu nun me queda más que mandavos un abrazu virtual.
Y deseavos que pronto volvamos a la normalidá y que los abrazos reinen nel mundu.
