Munches veces desapaecen coses en casa ensin esplicación, y, de sópitu, alcontrámosles nel llugar más inesperáu. Echámos-y la culpa al sumiciu y otres veces al trasgu.
El sumiciu y el trasgu quiciabes seyan hermanos, dos seres eternos que viven ente nós dende hai milenta años y cada vez tienen más llugares onde facer de les suyes. El sumiciu ta especializáu n'escondelo too. El trasgu, (trasnu nel occidente) fainos rabiar, escalistra en tolos requexos de la casa y dexa too revuelto. Présta-y tracamundiar les coses y asina revuelve caxones, despenses, baúles y armarios, llugares onde reparte col trasgu'l so territoriu de diversión. Agora tamién anden nes neveres, nos llavaplatos, nel arcón conxelador, nel televisor, que nos lu prenden y apaguen cuando-yos peta, nes llavadores, ¡cuántes veces nos desapaez un calcetu o una prenda pequeña ensin saber cómo! Y tienen tamién el so sitiu n'otros artiluxos de los qu'agora nun somos a prescindir. Yo tengo un trasgu dende va tiempu abellugáu nel móvil y por veces nel ordenador. Alterna y esqueira y vive ente los dos aparatos, calentín, al son del tecláu, o sintiendo los pitíos del whatsapp y alcuéntrense de lo más a gusto. Por más que lu quiero escorrer, disfruta cada momentu faciéndome falcatrúes. Cámbiame archivos de sitiu, pon comes a mamplén onde nun deben dir, come pallabres, escribe coses rares nel whatsapp, tracamundia mensaxes y mándamelos a otru contautu y otres chances que se-y ocurren.
El sumiciu tamién vive na mio casa, nun para trabayar escondiéndome coses en llugares de lo más inesperao. Dalgo que me paez tener delantre los güeyos, desapaez talo como si me lu arrampuñaren de les manes; les gafes, les llaves, el móvil, el reló, los papeles, archivos nel ordenador, ente otres diablures.
Sicasí, cuasique tenemos solución pa too. P'alcontrar les coses que'l sumiciu nos escuende, el meyor remediu ye echar la oración a San Antonio y si al dicila nun tropezamos, ye seguru qu'apaez nun tris y alcontrarémoslu onde menos lo pensemos y nel llugar onde yá miráremos venti veces. Otra cosa ye que tropecemos al rezar. Entós enxamás vamos a alcontrar l'oxetu perdíu. Si la oración va acompañada d'una llimosna, siempre será más rápido y eficaz l'actuación del santu milagreru, San Antonio bloquiará darréu los malos poderes del sumiciu.
Mala solución tienen otres actuaciones d'esti ser invisible. Sentimos a menudu esta frase: "mal sumiciu lu suma"o "mal sumiciu la lleve".Y esto tien que ver con otros de los sos poderes dañibles.
Paez que nun se conforma con esconder les coses, que nun pasaría de ser una broma. Pero ye quien a causar gafez a les persones y sobre too a los neños "sumiéndolos", consumiéndolos poco a poco y ensin causa aparente. Como tolos seres misteriosos, hai que tener cuidáu con él o echar darréu'l rezar a San António.
Oración a San Antonio:
Si buscas milagros mira/ muerte y amor desterrados/ miseria y demonio huídos,/ leprosos y enfermos sanos./ El peligro se retira,/ los pobres van remediados./ Cuéntenlo los socorridos,/ díganlo los paduanos./ Gloria al padre, Gloria al hijo,/ Gloria al Espíritu Santo. /Gloria a Cristo por nosotros,/ Antonio glorioso y santo,/ para que dignos así/ de sus promesas seamos/Amén.Jesús. (Versión de Esther López).
