"El tempo corre / y volves, de novo, a esta tierra que nos acoye?". Los versos de Jandro de Queitano valen pa presentar l'últimu númberu de la revista "Trabatel", que llegó'l pasáu mes de payares, fiel a la so cita añal, pa espardise de baldre ente los llectores. Caltién el formatu habitual y trai una nueva esbilla de lliteratura en gallegoasturianu y una muestra de fotografíes de la fastera más occidental d'Asturies feches por Verónica Peláez Baniela; un complementu mui eficaz a les palabres equí escoyíes pa cuntar el mundu eonaviegu. Como ye vezu, cada una de les collaboraciones de creación va introducida por una breve glosa vital y curricular del autor correspondiente. Nesta ocasión, la mayoría de les firmes qu'apaecen repiten nes páxines de la revista o tienen presencia lliteraria reconocida. Sicasí, la intención editorial tamién ye facer d'esta publicación el llugar afayadizu p'atropar les aportaciones d'autores noveles.

Abre'l presente númberu Cristóbal Ruitiña con "Pedrasapañadas", un relatu qu'asitia nel conceyu de Grandas, na posguerra, y que se posa nun episodiu de cotidianidá cruel y afogante, con desenllaz sorprendente. Conchita Álvarez Lebredo firma cuatro poemes de señardá, amor, pasu del tiempu y unión cola tierra, amás d'un relatu que fala d'amor y lliteratura. Alejandro Fernández García, J andro de Queitano, ofrez versos d'alcordanza del pasáu y de dibuxu del paisaxe, esplorando diferentes formes poétiques, como los haikus. "Los zapatos de Marco", d' Ángeles Rodríguez Montañés, ye un relatu que xuega col poder emocional de les supersticiones; en "Por San Miguel", Javier Fernández-Catuxo propón una historia d'amor prohibíu a la que-y sobró mieu y faltó valor; José Manuel Gayol Suárez, Babel de Cal Cadete, dedica la so atención al agua, elementu col que constrúi estos poemes; "A pantasma das Penas de Vilar" ye l'estrenu lliterariu de Laura Amor Fernández, qu'escuéi un cuentu tradicional y local narráu con estilu propiu, pero cuidando d'axustalu a los cánones del xéneru al que pertenez; con "Xa nun es nada" reapaez Christian Lanza, quien se val del xéneru epistolar pa dir axeitando una desasosegante realidá. Tamién hai un sitiu acutáu pa la traducción, que vuelve a firmar Xosé Miguel Suárez Fernández, con un cuentu de Dashiell Hammett: "El camín á casa". P'acabar, "Terrificar Marte", la propuesta a mediu camín ente ensayu y prosa fantástica de Fredo de Carbexe. Anque la temática resulta variada y diferente, lo cierto ye que delles narraciones aballinquen na llende ente'l mundu de los muertos y el de los vivos, o bien ente la realidá y la fantasía. Y munches poesíes comparten el sentimientu de señardá, la identificación del poeta cola naturaleza y les reflexones que trai'l pasu del tiempu.

Complétase la publicación coles reseñes de dalgunes de les últimes publicaciones de lliteratura eonaviega de los años 2017 y 2018: Adriana Martínez Suárez comenta Había úa vez?101 contos del conceyo del Franco, la recopiliación de cuentos tradicionales de Martin de Villar; Marisa López Diz trai noticia d'Algún son?tres, el poemariu de Belén Rico Prieto; Lorenzo Méndez Avello fala de Cúntame un conto, antoloxía de cuentos de varios autores asturianos pa públicu infantil y xuvenil; Emma Méndez atiende pa Operación llóntriga, novela infantil escrita por Aurora Bermúdez Nava y Alberto Castro Gión comenta Roger, el reno que chegóu de llonxe, un cuentu pa nenos d' Ángeles Rodríguez Montañés.

Que valgan de conxura pal futuru de la revista los versos de Conchita Lebredo: "Foi ayer condo aformentóu / un amor qu'amasara sin querer / en bocaos de vagar / entre xeira y xeira. / Foi hoi condo quixo apigarzar / y lo ataniguéi pra qu'espilise".