La lliteratura ye, en bona midida, una gamberrada culta. Munches de les grandes obres de la hestoria nacieron baxo l'arna del humorismu (col Quixote como exemplu de más sonadía) y lleven esa perspectiva a ámbitos más amplios de reflexón. Asina, Ósculos d'agua nel Imperiu Asturianu, de Xaime Martínez, xurde con esi enfotu y ye tamién a superar les llendes puramente gamberres de la propuesta inicial. Vamos partir del fondu de la obra, si bien un aspectu fundamental va ser la forma y nello hai que parar más tarde nesta reseña. De mano, sobre'l fondu, Ósculos d'agua? revisa dellos mitos dende un puntu de vista épicu ya intemporal. Mesmo qu'en Mensagem, de F ernando Pessoa, onde emponderaba símbolos y personaxes nun marcu idílicu de patriotismu sebastianista, asina Xaime Martínez figura qu'un futuru Imperiu Asturianu encarga a un poeta qu'ufierte una visión del pasáu distinta y favorable a los intereses patrióticos del imperiu. Que construya nacionalismu, en resume. Martínez ponse a ello y abre'l llibru con un prólogu a una ficticia Hestoriografía Llírica del Imperiu onde cuenta l'orixe de la so xera: cantar el pasáu gloriosu del Imperiu Asturianu: "Asina l'Imperiu Asturianu / apunta a un tiempu posible".

En poniendo la primer piedra, el poemariu abre con una güeyada a Gausón, el caudillu astur que lluchó pola independencia contra los romanos. Gausón mira'l mar dende'l so castiellu mientres siente aportar les tropes del emperador Augusto. El de so ye un destín d'agua, un regueru poderosu que desapaecerá na ñublina de la Hestoria. Xaime Martínez recupéralu pa la mitoloxía nacional del Imperiu Asturianu y conviértelu na primer piedra d'un pasáu gloriosu. Gausón remite al emperador, que se manda del agua pa gobernar les sos tierres: "Hai nel Ríu Sil, / el del país ocultu, / corriente enriba, / un poste sagráu; / corriente embaxu, / un poste escuru." Los dos usen l'agua como ferramienta poderosa, y el poeta venceya l'Imperiu a símbolos como l'espeyu, la rosa y l'agua nuna iconografía máxica d'evocaciones y badagüeyos. ¿Hai dalgo de Yeats, de quien Xaime Martínez tornó apocayá La torre, na rede de metáfores, imáxenes y alegoríes qu'apinen estos Ósculos d'agua??

Nun podía faltar nin Pelayo nin Favila, que cumple como mesíes y sacrificiu del Imperiu Asturianu. Tampoco Urraca, de quien se narra qu'apaez nuna gran masa d'agua cabo una Central Térmica. Nel imaxinariu de Xaime Martínez la Santina ocupa'l centru del mundu, como neses tradiciones orientales que falen d'un sistema radial que xunce l'universu nun tou complexu y absolutu. Esi centru ta tamién nel centru de la tierra y ta tamién nel centru de la fema. El volcán de la vida españa y l'Imperiu esparde los sos dominios per dayuri acullá de toa llende. Nesti futuru míticu l'Imperiu Asturianu espúrrese pel mundu como nación principal. Ellí onde Pessoa espera la vuelta del rei Sebastian, Xaime Martínez espera la llegada de la condesa Isabel de Noreña. El mar como nacimientu simboliza una vegada más un imaxinariu d'alegoríes perceptibles y canóniques: "Si valtien castiellos y ríos / nos llugares nunca vencíos, / pel mar tornará la Condesa."

El nacionalismu ye la construcción d'una mentira común. L'autor d'esti poemariu propón que Paul Simon y Xosefa Xovellanos s'enamoren a lo llargo de los años 70 en Hollywood, fala de la casa embruxada de los fabricantes de rifles Winchester ("¿Alcuérdeste, amor míu, / de les nueches de pantasmes, / de les pistoles d'agua / bendito y mineral?"), recuerda la vegada mítica en que Belarmino Tomás caminó sobre les agües del ríu Nalón, o canta la odisea rural de Tomasín, fugáu al monte por un crimen cainita. L'apariencia gamberra del poemariu dexa'l regustu xustu de xuegu y seriedá. Hai dalgunos versos afortunaos y un riesgu intelixente en divertir al llector. Respective a la forma convién conseñar que la obra ye un llibru-discu, yá que los poemes tan musicaos y cantaos pol autor. Pero amás, destaquen sobremanera los dibuxos absolutamente magníficos de Daria Fedotova, que xunta unes llínies de raigañu célticu en blanco y negro que remiten a una mitoloxía asturiana nueva y restallante. Les figures, propies de la Hermandá Prerrafaelita, lo mesmo recuerden a un Rossetti qu'a los muyeres de los carteles d'Alfons Mucha y su Art Nouveau. Sensualidá y cuidada composición evoquen un mundu míticu nel qu'Asturies ye un imperiu.