Tuviemos anuncia recién de Manuel García Menéndez (Uviéu, 1962) por ser l'últimu gallardonáu col Premiu "Xosefa Xovellanos" na so 39ª edición con El visitante impropiu, una novela de detective ambientada nel Uviéu de finales del sieglu XIX. A la espera de la so publicación, llega primero otra propuesta del autor: El faru de Gram, una novela curtia ya intensa cola que s'adientra nel xéneru negru -y nórdicu- y que va facer arrespigase al llector. Publícala Saltadera, qu'inaugura con ella "Zafir", la so coleición de narrativa breve. García Menéndez, que yá publicara dellos títulos de lliteratura infantil y la novela La sienda del amigu feliz, vien a sumase a la nómina d'escritores que yá esperimentaron cola corriente criminal o negra n'asturianu: Xuan Xosé Sánchez Vicente, Adolfo Camilo Díaz, Vicente García Oliva, Pablo Antón Marín Estrada o Roberto González-Quevedo, ente otros.
El faru de Gram ye una historia ambientada na actualidá nuna pequeña isla danesa que nun llega a los cinco quilómetros cuadraos pa trenta y nueve cases y un faru, pero solo son cuatro los habitantes que pasen ellí tol añu, n'apacible convivencia. Dos homes y dos muyeres qu'amataguen la soledá con ratos de vecindá amistosa y un par de prestoses cenes selmanales compartíes, pa esfrutar tamién de bona comida y bebida. Polo demás, poco tienen que ver ente ellos Joli, Anders, Else y Richard: la escritora, el vieyu marinu, la pescadora y el fareru. Poco sabe caún d'ellos de la vida del qu'alterna a la vera. Y too diba siguir siendo asina de nun ser pola banda violenta qu'asalta la isla, corta les comunicaciones col esterior y secuestra a los habitantes, faciéndolos testigos obligaos del actu criminal que van executar y pal que precisen del so silenciu. Cuatro homes y una muyer frayen de sutaque la rutina de los grameses, forciando una convivencia esmolecedora que nada tien de pacífica y muncho d'agresiva. Vienen entós unes hores de pruyimientu, dudes y llercia, mientres qu'esperen pol desenllaz que los llibere y vuelva les coses a la normalidá. La tensión miedra y apavoria dica'l final; inda más cuando un xiru inesperáu cambia'l plan orixinal.
Un autor llenu d'aciertos dirixe al narrador omnisciente d'esta novela qu'arranca dientro d'otra novela y ta dividida en cinco capítulos; un trabayu narrativu que tamién se val de monólogu interior, de diálogos reveladores y de retrospecciones que completen a los personaxes al soltar les pantasmes del pasáu; de descripciones qu'esponen al detalle tolos datos convenientes pa vistir bien l'acción y metenos nel contestu. Porque escueyi un motivu criminal, consigue una novela negra d'acción emocionante, pero non solo eso; tamién una novela psicolóxica qu'escarba nel mundu interior y nes circunstancies de los protagonistes, y un relatu naturalista qu'espón a les clares los instintos y les baxes pasiones que mueven a los homes y muyeres que nos presentó. Una novela moderna en cuantes que nos trai dalgunos de los temes favoritos y los problemes d'anguaño: el despoblamientu, l'individualismu, la soledá, la deshumanización, la traición, el perdón, la medrana o la violencia (non solo como métodu criminal, sinón tamién la so llicitú como mecanismu de defensa).
El trabayu de seleición del léxicu foi minuciosu y esquisitu, curiando por dar cola palabra atinada, apostando seique pola voz más escaecida, pola espresión afayadiza. La escoyeta paez a veces arriesgada, pero resulta un valor añadíu al conxuntu que se llee con ansia ya inquietú, dos estaos que queden nel ánimu n'acabando. Novela curtia, pero mui series les coses que pasen a lo llargo d'estes cien páxines; actuales, cercanes. Lliteratura qu'entretién, esmuel, conmueve y ta escrita con gran procuru, qué más se pue pidir.
