L'autor xixonés Diego Solís ta en racha. Promotor de "Fame Poétika", conduz n'internet los videos lliterarios de "La cla invisible" y ye codirector de la revista "Formientu", ún de los más relevantes esfuercios de la lliteratura asturiana por apurrir voces nueves pero, sobre too, por caltener un proyectu continuáu nel tiempu en rellación al nuestru desarrollu lliterariu. En 2018 sacó Hágase abril y ganó el premiu Asturies Xoven de Poesía con Cállanos con esa música, títulos onde destaca de mano la querencia del autor pola forma verbal del imperativu. Agora presenta nuevu poemariu, nesti casu n'asturianu. Solis paña'l clásicu del cine mudu "The Crowd", tituláu equí "Y el mundu marcha", pa ufrecer un poemariu de desmitificación social ("La mio herencia ye un país, / un país en ruines que constrúi / los sos finxos pente'l barru"), rellectura de la mocedá ("Alcuérdome de ti / cola sorrisa enllena de vergoña ya inxenuidá, / veníes sele y zarrabes los güeyos al besame"), y cuestionamientu xeneracional ("La mio xeneración ye una pantasma / que viaxa nos aviones / que cuerre pelos chigres / y torna pa facer como que vuelve"). Usa pa too ello una señardá pedrés, nada cómoda nin complaciente: "Namái qu'había páxaros, nuberos, carbayos / d'esperanza naciendo ente les manes". Pero al empar nun pierde la ilusión de que les coses puen cambiar, de qu'hai un futuru meyor dayuri. Nesti sentíu, atopamos nestos poemes una güeyada reflexiva a la condición humana ("Llibertá yera un asuntu / que nun son quien a remanar") que frecuenta les afirmaciones sentencioses o les impresiones categóriques de la realidá. Diego Solís nun especula, afirma y define. Da conceptos. La so reflexón nun queda en pura ebanistería. Como en "Nun se m'olvida", onde albidra la rellación ente misericordia y cinismu, o la solitú que dexa escapar estos versos: "Somos toos islles dixebraes, / raigañu muertu / ensin más amor qu'un glayíu". La desesperación del perdedor véncela la esperanza ("Pero ye namái qu'un mal día"). Ye, ensin dulda, un llibru sobre lo que "ye" enantes que sobre lo que "fue", "va ser" o "tien que ser".
Dende los primeros poemes, Solís marca distancies col Tiempu como entidá. Val pola so brevedá el poema tituláu "La memoria encesa": "Toles alcordances lleguen / coles manes tapando los güeyos. / El presente ye namái un puntu muertu, / el futuru, un camín ciegu / y el pasáu, un alimentu / que mira reviráu a los traidores". Volvemos entós a revisitar la señardá, pero non como estación de llegada afayadiza onde se refuxaron y refuxen tantos poetes asturianos, sinón como un espaciu desmitificáu sobre'l qu'ha falase ensin glorificar. Solis nun tien concesiones cola señardá: "Hai que matar la señaldá, / finala, acabar con ella, / señalala bien col deu, / hasta apreta-y esos / güeyos húmedos y murnios". Lleemos llamaes constantes al pasu del tiempu como narración d'una fuxida ("Abrir la mano, dexalo cayer, velo colar. / Como colen les moces, los amigos y los años"). Lo que nun hai ye condescendencia, nin disculpes, nin escuses, nin llamentos. Solo escepticismu. Diego Solís busca la señardá como referencia, pero nun ye quien p'afayase nella. Paez incómodu, fuera llugar. Y a veces esa señardá remite a lo que pudo asoceder ("¿Manca?") enantes qu'a lo qu'asocedió: "La mancadura, por embargu, / hai que tornar siempre a reescribila").
Los versos esnidien a poco y a poco ante los güeyos del llector y queda la sensación de que la vida sigue y nada la frena. Abonda una oportunidá pa reblagar percima les dificultaes. El poeta guarda esperances tovía ("El mundu marcha, con nós, / nun ye tan malu"). Les buelgües que dexamos al andar dibuxen un mapa del nuestru mundu, y del percorríu que la vida nos permite soportar. La memoria solo se prende cuando necesitamos dar un pasu adelantre. Y el mundu marcha ye un poemariu d'abandonos, una busca d'otros sitios que tamién sían propios. Diego Solís tien una voz enllena de referencies pop, que dixier pa convertilos en poemes tranquilos sobre'l papel. Nun amosa estridencies o esparabenes. El tonu ye dialogante, capiando siempre a un "tu" amorosiegu o señardosu col que'l poeta alderica (rares veces usa la voz de la primera persona). Fálta-y quiciás esi intentu d'arriesgase a lo llargo del llibru nel usu de recursos lliterarios más firmes o orixinales, masque puea zarapicar nel intentu. Nun autor mozu sería perdonable. A lo meyor prefier asegurar, dir sonce. En tou casu, Diego Solís sigue dando pasos. Y ye una bona noticia.
