Paquita Suárez Coalla (Grullos, Candamu, 1965) ye escritora reconocida nes lletres asturianes. Les sos circunstancies personales y profesionales (profesora de la B.M.C.C. City University de Nueva York y residente nesa ciudá dende hai venticinco años), determinen la so lliteratura, carauterizada polos xeitos de una bona contadora y l'estilu bien asimiláu de les técniques de la oralidá narrativa. Na estaya de la lliteratura infantil algamó'l Premiu "María Josefa Canellada" nel añu 2011 con Camín de lletres: d'Asturies a Nueva York, una orixinal propuesta na que una neña de la gran ciudá empieza a descubrir l'amor polos pueblos asturianos al traviés d'un abecedariu que percuerre los llugares y les ayalgues del país. Paecen esguiles, anque diferente en fondu y forma, ye la evolución natural del llibru anterior: pasaron los años y la protagonista d'anguaño ye una rapacina que miedra pa l'adolescencia, con intereses y esmoliciones que lleven el posu propiu de la nueva edá.

Nun hai un asuntu principal nesta crónica d'unes llargues vacaciones de branu nun pueblu d'Asturies. Nada estraordinario pasa nestos cuarenta capítulos más que los díes, que vienen uno tres d'otru llenos d'aventures inolvidables. Per aciu d'una xoven narradora mui observadora y que yá s'interesa pola escritura, Paquita Suárez Coalla amaña una narración costumista llena de detalles contaos con gran curiosidá que perfilen una acción mui rica y dinámica, gracies tamién a personaxes bien caracterizaos: les dos hermanes, la prima, les amigues, la madre, la güela sollerte, el güelu atentu, los vecinos solidarios y serviciales. Y mientres se cuenta la vida, hai dellos temes que se traten de manera específica: los problemes del pueblu, descritu col realismu que nun refuga la crítica a les males comunicaciones y al despoblamientu o la importancia de los animales domésticos y cómo'l so cuidáu enseña a la mocedá a responsabilizase y madurar. Les señes de l'adolescencia vense nel interés de les rapacines polos móviles o la moda y la inevitable atención de la madre pa que nun seyan esclaves d'ello. Los males de la vieyera asomen n'enfermedaes de dalgunos conocíos y esmuelen a los más vieyos, pero dambes etapes vitales encaxen con muncha harmonía nel relatu y fúndense nuna relación entrañable. La fiesta'l pueblu ye'l picu d'una allegría que yá mengua, porque tán al acabar les vacaciones. Y como siempre que tienen que marchar, hai una esgayadura emocional; alternar la vida ente dos llugares tan diferentes y tan llonxanos sotripa les emociones infantiles y les adultes: "Cuando l'avión empezó a despegar y dio una vuelta per San Esteban y viemos la piscina, y la playa del Garrunchu, y el pisu que mio tía tien en San Esteban, y cuando pensé que diba pasar un añu enteru hasta que volviéramos ellí, encoyóseme'l corazón y otra vez me punxi a berrar. La mio hermana tamién empezó a llorar y a mio ma, al sentinos, soltáronse-y les llárimes. Mio pá abrazónos a les tres y prometió que nos diba traer pel iviernu a corchar la sidra". La vuelta a la ciudá y la rutina de la vida d'ellí van amatagando adulces la intensidá del relatu.

Un prestosu mostrariu de dalgunes coses importantes de la vida, un sofitu contra'l desarraigu y la señaldá cuando hai una casa y una familia a milenta quilómetros de la otra. Un discursu nuna llingua mui apegada a la oralidá, con rexistru coloquial y xuvenil que tamién contién guapes espresiones patrimoniales, mui necesaries p'alcordase d'Asturies cuando la vida seya en Nueva York. Un exerciciu qu'espeya un mundu de sabiduría doméstica y popular nesta esperiencia pa la mocedá permitida tamién pal públicu adultu.