"Yera un día d'abril lluminosu y fríu, y los relós marcaben les trece". Asina entama una novela que ye un clásicu, 1984, de George Orwell. Descubrir agora dalgún requexu y sienda que nun caleyaran enantes milenta de filólogos, ensayistes, escritores, críticos o estudiosos de política o socioloxía va ser cazalbo. Poques obres na lliteratura algamaron la sonadía lliteraria y repercusión na cultura popular que 1984. Y nun voi ser, de xuru, el primeru que rellaciona esta obra con V de Vendetta, la maraviya del cómic que firmó cuantayá Alan Moore, autor por otra parte avezáu a facer obres maestres en serie. Entrambes obres atopamos una sociedá británica de carácter distópicu, o utópicu, na que'l control de los medios de comunicación sobre la xente lleva a una asfixa esistencial. Nel casu de 1984 la presión sobre la ciudadanía ye aínda más ablucante. Y ellí onde Alan Moore crea un personaxe violentu que golpea pa fundir la sociedá entera, George Orwell prefier una resistencia individual qu'asemeya muncho a una resistencia pasiva o oxeción de conciencia. El protagonista, Winston Smith, fai asina torpes intentos a lo llargo de la obra de lliberase del control gubernamental. Nostante, los enfotos del Partíu que gobierna Oceanía son perturbadoramente reales y actuales. Lo cimero, pamidea, d'esta obra pue resumise na so atemporalidá. Nun resulta nada difícil parar a mirar la importancia de los medios de comunicación y les redes sociales d'anguaño pa decatase de lo pertinente que ye 1984 como motivu de reflexón y xuegu d'espeyos (lliteratura/realidá).

La sutilidá de los mecanismos de control del pensamientu, eso que vino en llamase "marcu cognitivu" ente otres denominaciones, desapaez como dalgo tácito en 1984. Y a plena lluz del día furrula'l control de la realidá, que na neofala recibe'l nome de "doblepensar", un solipsismu cínicu per aciu del que la población d'Oceanía engáñase a sí mesma. Porque un aspectu fundamental del imaxinariu de ficción que crea George Orwell ye la implantación y usu d'una llingua con cada añu menos pallabres. "La intención de la nuevafala nun yera namái ufrir un preséu d'espresión pa la visión del mundu y pa los vezos mentales propios de los devotos del Socing, sinón tamién faer imposibles toles demás maneres de pensar". ¿Una tochura? Nun paez si paramos a cabilgar l'emplegu ilexítimu de la semántica por parte de los políticos actuales, que resignifiquen pallabres y espresiones cola desfachatez más falanciosa. Tenten (na novela y na realidá) d'inventar al so gustu presente, pasáu y futuru. "El que controla'l pasáu, controla'l futuru. El que controla'l presente, controla'l pasáu". Orwell denunciaba'l comunismu soviéticu, pero resulta inevitable nun referise al neolliberalismu de les nuestres sociedaes occidentales. "La ortodoxa significa nun pensar, nun necesitar pensar. La ortodoxa ye la inconsciencia". L'oficiu de Winston Smith consiste precisamente en facilitar esa inconsciencia reescribiendo trozos de periódicos y llibros pa facer desapaecer la mentira escrita de traidores al país, correxir predicciones enquivocaes nos discursos del Hermanu Grande o falsificar datos alministrativos que convién tapecer. Arriendes, el llibru complétase con un apendiz dedicáu a la nuevafala, lo que fai d'esta versión una traducción única y estimable en comparanza inclusive coles tornes qu'hai al castellán, amás d'otros munchos méritos.

Pero Smith caltién tamién munches incertidumes: sábese traidor. Contactar cola Hermandá, la organización clandestina y de duldosa esistencia qu'axunta a los rebeldes, constituye un elementu de anagnórisis sobre la identidá de Winston Smith. Garra les riendes de so vida y ello pémeque fáilu más humanu. Nun momentu dau un miembru del Partíu diz: "Cuides que la realidá ye dalgo oxetivo, esterno, esistente por derechu propiu. Tamién cuides que la natura de la realidá ye evidente por ella mesma. [?] Pero dígote una cosa, Winston, la realidá nun ye esterna. La realidá esiste na mente humana, y en nengún otru sitiu más". Contra ello va lluchar Winston Smith. Sobre'l so final, el llector habrá d'atopalu nes páxines entretenidísimes y tristísimes de 1984. La maxa d'esta obra ye espeyar un presente que por presente nun abulta menos improbable qu'esta novela. Efectivamente, y como deduz el mesmu Winston Smith, "los llibros meyores [?] son aquellos que te cuenten lo que yá sabes".