Diego Solís (Xixón, 1991) ye ún de los nomes necesarios na última lliteratura n'asturianu: codireutor de la revista "Formientu", entamador de los alcuentros Fame Poétika y críticu lliterariu, el so exerciciu d'escritor guañó na publicación de tres poemarios, amás de firmar collaboraciones habituales en revistes y antoloxíes. Coles composiciones qu'allugó en Cállanos con esa música resultó ganador del Premiu Asturies Xoven de Poesía 2018, un conxuntu de cuarenta poemes dientro d'una arquitectura cenciella na qu'usa dos llingües ensin complexos, entemeciendo con naturalidá billingüe poemes en castellanu y asturianu a partes iguales.
Los versos del "Preludiu" amañen una moderna captatio benevolentiae qu'esplica la intención y el conteníu del trabayu: lo qu'equí se fai ye una esperimentación coles palabres, imáxenes y soníos que fueron acumulaos como favoritos, una confesión cultural y una ufierta orixinal repartida en cuatro núcleos temáticos principales: l'amor, la escritura, la esistencia y la reivindicación. Diego Solís revisa la tradición lliteraria, musical y cinematográfica que mereció la so atención, desfáila y sométela a una restauración colos sos xeitos d'estilu. Reinterpreta los clásicos, revisa los tópicos y compórtase irreverentemente respetuosu col material canónicu; sotripa ensin pudor la herencia clásica y afáila a les sos circunstancies. Abelluga nel humor y la ironía, arremienda maneres, depura la espresión y llega a prestoses y concises sentencies filosófiques. Porque "amar ye almitir el llaberintu: / querer perdese, saber tar vivu", ye un nuevu Teseo'l que percuerre cuasi a tientes los caminos abegosos del amor: entrégase con pasión, atestaya énte suaños y espeyismos, allampa pol cantar de la serena, anuncia con tristura otres andolines o consuela a la infeliz molinera del cantar pa que recupere l'allegría. Cuando reflexona sobre'l fechu lliterariu reapaez aquel misteriosu escribiente: "Escribes un poema tantas veces escrito" y agora más que nunca tán xustificaes les pruebes y la multirreferencia a tantos maestros que s'averaron a la emoción perfeuta, a la fuerza d'un poema eternu: "Si yo escribiera el verso / que sonase al fin definitivo, / que arrancase de cuajo los pretextos, / sembraría sombra, vacío, todo lo quemaría, / por si vuelves". El poeta tien que ser un guerreru que nun se rinda énte la vida: "Si esti exércitu cai, si ye que suelta una llárima, / nun nos xulgar, namás defendemos una patria / pequeña y poderosa, que nun va muncho / deprendió a dicise". Y ye preciso que tamién seya un inxenieru del versu, y un obreru, comprometíu, feminista, que faiga denuncia de la desigualdá, la inxusticia o l'abusu que lo mesmo s'atopen nuna fábula inocente, nuna distopía del presente o nel absurdu récor qu'anubla una verdá mui triste. El llector nun ha de perder la ocasión de dexase guiar pola intertestualidá que Diego Solís propón y alcontrar les semeyances coles munches referencies al mundu artísticu, asturianu y universal, qu'ayuden al autor a encadenar esti cosmos de intercomunicación. Un cierre con composiciones asimétriques fai un resume de la intención del conxuntu y, con ritmu y palabres d'oración, encamienta'l buscu de los motivos qu'emocionen cola fuerza necesaria pa topar l'asosiegu de vivir en sonora harmonía col entornu.
El recitáu siempre ye un valor añadíu al testu poéticu. Escuchar dalgunos d'estos versos na voz del so autor ye posible gracies a la iniciativa del Festival Formientu en Casa Fest, qu'ofrez programes audiovisuales a través de les redes sociales pa difundir la cultura fecha n'asturianu: https://www.facebook.com/formientu/videos/formientuencasafest-%EF%B8%8Frecital-presentación-cállanos-con-esa-música-de-diego-sol%C3%ADs/3046161738767262/
Cuando sentimos la poesía, ye música lo que tamos escuchando: "Falo la llingua de mio padre porque tiraron la so casa / ya inda queden nella les pallabres".
