Son los años 70 y Mieres ye capital d'Asturies. ¿Una llocura? Non, una novela. Dientro del xéneru de ciencia ficción atopamos les distopíes, les utopíes y les ucroníes como subxéneros particulares y característiques propies. Les distopíes y les utopíes imaxinen sociedaes futures o presentes, bien onde les condiciones de la mayoría van vese empeoraes hasta les llendes de lo tolerable, nel primer casu, o bien onde les persones viven nun espaciu sociopolíticu equilibráu y perfectu pa según qué ideoloxía, nel segundu casu. Una ucronía consiste, non tanto na bondá o maldá de ciertos sesgos totalitarios (sí, les utopíes son siempre totalitaries por munches ayalgues que quieran vender), como en plantegar llinies temporales alternatives pa figurase una trama nun escenariu que pudo ser y nun fue. Lo básico d'estes noveles nun asitia n'esplicar hasta que puntu afecten pa bien o pa mal determinaes propuestes ideolóxiques. L'envís del autor empobina a los personaxes a desendolcar una hestoria propia na que l'ecosistema condiciona pero non determina'l final de la obra.

Esti preámbulu tan llargu vien a cuentu pola querencia tan marcada de Nicolás Bardio poles ucroníes. Si na anterior novela ( Cuando ensamen les abeyes) proponía una aventura a principios del sieglu XX, en plena desintegración y pérdida de les últimes colonies por parte d'un Imperiu asturianu que nació cuando nun quixo xunise a Castiya nel siglu XIII, la so ópera prima ( Sol reló) ambientábase n'actualidá, una actualidá bien distinta a la que conocemos con una Asturies como estáu independiente (daquella firmaba l'autor como Nicolás V. Bardio, con más ganchu pal mio gustu que'l nome lliterariu qu'usa anguaño). Agora llega La colomina 36, espaciu físicu nel que trabaya Fabián, axente de la KGB na República Socialista Soviética d'Asturies, depués de que trunfara la revolución del 34 y Asturies pasara a formar parte de la URSS. Nesta colomina viven personaxes más o menos venceyaos al partíu, y Fabián tien por misión vivir ente ellos (nun s'esclaria baxo qué tapadera profesional qu'antroxe la impostura) y detectar cualesquier movimientu qu'indique una traición al estáu y al réxime comunista. Los enemigos capitalistes tan demasiao cerca, mesmamente al otru llau del cordal o del mar, y la pequeña república soviética supón un bocáu triscaderu pa les potencies estranxeres que l'arrodien.

A diferencia d'otres ucroníes, más centraes nos fechos históricos y nos personaxes públicos, esta novela prefier narrar con axilidá y usu frecuente del monólogu interior (a vegaes diálogu en voz alta consigo mesmu) la vida diaria, ambiciones y desesperaciones del axente secretu, llamáu a más altos méritos ya inxustamente condenáu pol mandu a descubrir lo qu'heba descubrir na colomina del títulu. Pienso en La conjura contra América, de Philip Roth, Lo que el tiempo se llevó, de Ward Moore, El hombre en el castillo, de Philip K. Dick o la maraviyosa El sindicato de policía yiddish, de Michael Chabon. Nestes noveles l'escenariu sirve pa encartiar la trama y non al revés. N'otres ucroníes lo importante ye cuntar qué-y pasó a los personaxes públicos y cómo afecta a la llinia de la Hestoria, pero na novela de Nicolás Bardio, y nes que cito, el focu ta dirixe l'interés p'hacia la microhestoria: esa república socialista acueye una novela d'espionaxe cola coherencia propia d'estes obres. Asina que podría pensase, con razón, que La colomina 36 ye una novela d'espíes, más qu'una obra de ciencia ficción.

Visites, paseos, carreres, charres intrascendentes, investigaciones en cases ayenes, xiros de la trama? La novela déxase lleer con comodidá, busca l'entretenimientu y nun engaña nes sos pretensiones de divertimentu llector. Nuna ucrónica Asturies con oficialidá, masa crítica de llectores ya industria editorial amplia, taríemos ante un testu con bona tirada y una bultable cantidá de llectores. El final va satisfacer al habitual del xéneru negru y, quiciás, la novela faise dalgo curtia. Hai personaxes que permitíen un desendolcu mayor, especialmente los secundarios de la colomina, masque tamién la prometedora Daniela. ¿Pue ser una segunda parte más llarga y más fonda, con más subtrames y complexidá narrativa? Dende llueu, paga la pena la llectura d'esta novela qu'abre sienda na lliteratura asturiana.