Los raigones asturianos de Conchita Álvarez Lebredo (Vigo, 1970) cuantayá que biltaron en trabayos d'investigación llingüística y lliteraria en gallego-asturianu, asoleyaos en dellos númberos de la revista "Lletres Asturianes". D'un tiempu p'acó tamién vien sintiéndose la voz de la creadora qu'apurrió collaboraciones esporádiques a publicaciones como la revista "Trabatel" y dalgunes antoloxíes. El so trabayu poéticu llega a pintoiru con esti estrenu editorial de títulu que convida a la intimidá y la cercanía: Na palma da túa mao ye una llarada de trenta y seis composiciones pa facer la presentación emocional d'una autora yá reconocida en gallegu: col poemariu Distancias e simetrías fíxose col Premiu "Victoriano Taibo" en 2012. Llega otru nome de muyer pa sumase de plenu derechu al selectu grupu d'escritores que, con esquisita sensibilidá, tán dando cuenta del carácter y el mundu eonaviegu nes dos últimes décades.
Les llinies de la vida entera tán na palma d'una mano. Si se fai fondura cóncava abelluga'l pasu del tiempu, la tristura, l'amor, el desengañu y el poder de la imaxinación; cuando estira en llanura donda val pa sofitar la historia y el llugar nel que miedra la singularidá personal. Los instantes qu'equí se comparten tán confesaos con sinceridá y trataos con estoicismu, a veces cola ironía necesaria p'amansar el dolor. El llirismu heriede de los románticos badia ente'l sentir de la naturaleza, la llibertá, la muerte, l'amor y la pena, esperiencies y sentimientos que puxen con claridá intelectual y con bayura sensorial. La narración arrampla nunos pocos poemes que precisen d'otros xeitos: llargura argumental, principiu y final. Álvarez Lebredo promete fidelidá a les emociones y cumple coles espectatives: "Créome poeta y nun decido / muito máis qu'un animal. / Escriben por min el anticiclón, / el fluxo das mareas, / as fases da lúa, / a cayida das foyas, / el eclipse total". La parte principal del poemariu dizla l'amante que conoz la felicidá de la entrega, pero tamién la inseguridá, el mieu, les señes del cansanciu, el descubrimientu del desamor y la tristura del adiós, episodios que, sicasí, asúmense con resignación, como naturales daños collaterales. La gravedá de la vida escluca permanente dientro de la mente reflexiva; el pasu del tiempu, la perda y la muerte son pilancos que precisen posa y encaxe pa poder siguir andando. Davezu, la señardá baxa como la nublina al recordar el paraísu perdíu: "Nun vas tar tu que m'aneines, / nin el lume, / nin berzo, / nin casa, / nin goxos, nin alpende. / Xa nun vai tar el tou colo milagreiro". Cuando la carga se fai insoportable, asoma la rebeldía qu'arreniega del dolor y hasta de la so recreación artística: "Non máis versos rosalianos, / poemas asolombraos de congoxas / heredadas", anque darréu reconozse que ye inútil la protesta ya inevitable l'oficiu de certificar la tristura. Sobre la muerte aplícase un filtru p'amatagar la pena, honrando a los difuntos cola oportunidá de la resurrección o confesando catalepsies sentimentales qu'entrenen na tolerancia a la desolación. El sentimientu d'unión cola tierra ye otru motivu fundamental; ente mares cercanos y llonxanos qu'espanten la soledá, una naturaleza con vida propia fai nieru pa les persones y da la réplica -non solo emocional, sinón tamién física- pa poder descansar: "Deitada nel herba cos brazos a encruz / neste verao ausente / tento d'adormentar os sentidos, / os delirios, / a conciencia [?] Cravo as uñas nel tarrén / pr'amarrame forte a ela. / Y, entoncias, xa sou terra, / reices, / herba". Na palma da túa mao yá ye otru de los sitios bien axeitaos pa la poesía.
