Esperanza Medina (Avilés, 1964) exerce de poeta en castellanu dende que nel añu 2006 consiguiera'l Premiu de Poesía "Ana del Valle" con Escrito con la a, un volume al que siguieron otros tres poemarios que confirmaron el so aciertu nel manexu del sentimientu cola palabra. Agora debuta nel panorama editorial asturianu con versos d'agradecimientu y reivindicación, con una ofrenda a esi pasáu que-y regaló la voz firme y verdadera que se siente nestes trenta y dos composiciones rotundes y cencielles, feches de recuerdos y emociones. Con elles, el merecíu homenaxe a les muyeres que la criaron y a la so llingua, porque ye la so intención asumir el compromisu xeneracional y aclariar les dudes: "Retorna-ys l'arguyu de sabelo de xuru: / que sí noman el mundu los nomes de la infancia".
La recién galardonada col Premiu Nobel de Lliteratura, Louise Glück, diz que "Miramos el mundu namás una vez, na infancia. / El restu ye memoria" y valen les sos palabres pa entender y resumir ún de los nucleos temáticos que sofiten esti poemariu: la memoria de la infancia feliz enfócase con aciertu al traviés d'una ventana d'usu invertíu que-y val a una nena pa mirar dende fuera la intimidá de la familia: "La ventana de la cocina yera, dende'l prau, / como un cuadru dividíu en nueve partes, / protexíu nél tolo qu'amaba". Posar la mirada naquellos cristales supersticiosos valía p'asegurar la certidume del bienestar y val anguaño pa definir "la espresión más tranquilizadora de la vida". Imáxenes felices, agora llonxanes y señardoses, conxúrense como valiosos cuadros pa un muséu de la memoria, una necesidá p'acompañar la vida adulta y pa esconxurar l'amenaza del desaniciu definitivu: "Dame tantu mieu que los güeyos olviden pa siempre lo que víen". La poeta sabe qu'escribir tamién val pa nun morrer y empéñase nello con procuru, con versos que curien l'amenaza del escaezu. Les llendes ente la infancia y la vida adulta esmúcense colos efectos d'una perda, col purgar d'un duelu que solo conduz a la tristura y la soledá. Medrar tamién significa medrana, delirios, inseguridá y la vivencia de tener que rumiar les secueles inevitables del pasu del tiempu; alviértese d'ello en varies ocasiones, mientres se confiesen xenerosamente dalgunos xeitos particulares p'acomodase a les midíes de la vida, como poner el cuerpu a escures pa nun ver los cambios, escondese ente la fantasía y la ficción o aprovechar los rellumos de felicidá que regale cualquier momentu, con un sabiu esfotu optimista d'esfrute del carpe diem. Na parte final, resulta pertinente y d'interés un conxuntu de poemes nos que se quier cumplir con una deuda coleutiva, la del papel de les muyeres na hestoria y la so llucha pola igualdá. Porque "nun tenemos derechu a tar callaes", la reivindicación de xéneru amuésase con arguyu y col brinde a les que se fueron sin ver encarrerada la sienda hacia la xusticia del feminismu. Relatos de valentía, de muyeres trabayadores, de les manifestantes d'anguaño, y tamién del terror de la violencia machista o del peligru de confundir con amor los comportamientos que pueden llevar a una involución nel empoderamientu femenín.
Esperanza Medina tamién miente. Failo cuando insiste na so humildá, na so inocencia nel oficiu: "Nun guarezo palombes nestes manes, / nin tengo nestos llabios un misteriu, / nin la voz melodiosa pa roba-y / al mar los marineros". Lo cierto ye qu'atina coles palabres escoyíes pa cuntar cómo ye'l son que guarda na cabeza y nel corazón. Les manes de muyer que nos reciben na fotografía de portada de La deuda: universales, candiales, sufríes, queden bien acariciaes con estos versos.
