Vo cuntar como "nació" el presuntu "pueblu" de Báscones, en conceyu Llanes. É, sabránlo pocos, un requexu asitiáu ente Villajormes y Jontoria, onde hay una juente y onde había una cuadra revieya. Esti día, el dueñu la corte pidió permisu pa iguala. Diéren-ylu, y jézolo: rehabilitola. Ello joi que l'Ayuntamientu, en cuantas hebo una casa, tiró de planu, recalificó la finca del otru lláu del camín y permitió una urbanización con un puñáu de xalés; "una monada", según unos madrilanos. Entós, como ya se cuntaban más de cinco casas, "nació", non sé si por xeneración espontánea, por mitosis, por partenoxénesis o por decretu, el "núcléu rural" de Báscones, pa mayor gloria de Llanes. Y é, o eso quieren, unu de los 119 "pueblos" que'l gobiernu local xura que hay en conceyu. Non estrañe que "nazca" mañana -o pasáu a más tardar- otru cerca, Los Esperteyos. Anque llamaránlu "Los Murciélagos". Al tiempu.