Los acontecimientos que pasaron estos díes d'atrás rellacionaos coles pites y el gallu cantor, propiedá d'un vecín de Sotu de Cangues, dexáronnos, una vez más, descolocaos ante la determinación de los xueces. Los turistes rurales, non avezaos a sentir el cantu'l gallu al amanecer, nin avezaos a sentir el cacarexar de les pites, nin otros soníos que tán apegaos a la vida n'aldea: la curuxa, los paxarones y paxarines, los babarones, los llobos, los corzos, los perros, les vaques? quéxense de que nun puen dormir. A ver qué xuez va manda-y callar a la curuxa o al llobu pa que nun moleste a los turistes repunantes.
L'aldea ta tomando otra forma de convivencia. Nun hai dulda que siempre hubo dalgo de griesques, y dalgunes precisamente porque les pites nun se conformen col terrén del dueñu y vanse a picotiar y a escarbar a praos que nun-yos pertenecen. Y, siendo como somos celosos de les nueses propiedaes, que nun se-yos ocurra pisar nin un palmu de lo que nun seya terrén propiu, porque dalguna ya pagó cola vida, a causa de les pedraes que-yos arreaben los vecinos. Probes pites.
Y seremos quien a desaniciar too, hasta echar les pites de l'aldea o quien sabe s'inventarán operales pa que nun canten, o intentarán da-y al gallu un somníferu pa que duerma la mañana.
¡Qué xusticia esta! Sicasí cuando desanicien les pites, a ver que faen col resto de la fauna nocherniega que suel cantar, glayar, bramar, aullar, etcétera.
Yo siento señardá porque na casa onde nací yá nun siento'l gallu cantar, y dame muncha pena. La casa quedó zarrada y mio madre quixo dexar ellí les pites, solines no gallineru, quiciabes como muestra de que nun llegare l'acabación del too. Pero nun tuvieron por munchu tiempu. Cuando llegábemos a pasar el fin de selmana, aquel gallu gayasperu, en cuantes sentía llegar el coche, poníase a cantar como un llocu. Yo empecé a pensar que'l gallu nos quería muncho, ensin que nosotros-y correspondiéremos porque nun tábemos ellí namás que dos díes a la selmana y lo único que facíemos yera dexa-yos la comida nuna tolva y recoyer los güevos. Les pites, tampoco-y facíen munchu casu, porque yá yera veyuscu. Naquel gallineru tamién reinaba la soledá. Les pites taben soles un día tras otru. Nun sé si'l cantu col que nos recibía'l gallu yera un cantu de protesta o de saludu. Encomencé a sentir remordimientu y a da-y vueltes a l'actitú d'aquel pitu, y tomé'l determín de dexar el gallineru vacíu, como la casa.
Pero l'ello ye que naide quería sacrificar aquel gallu cariñosu. Naide. Porque qué duru ye'l momentu de tener que sacrificar un animal de los qu'anden alredor de la casa.
Sicasí esi foi'l desenllaz. La casa quedó sola dafechu. Como tantes otres cases que van quedando zarraes n'aldea asturiana.
Quiciabes idealizamos tolo que vamos perdiendo, pero por nada me gustaría que se perdiera n'aldea'l cantu'l gallu, nin el cacarexar de les pites, nin otres munches coses. Los turistes que se faigan la idea de que van a l'aldea y que'l cantu'l gallu entra nel paquete.
