El colexu Río Piles de Xixón ye un non parar d’actividaes, yá seyan musicales, de concienciación o lúdiques. El centru apregona aquello de que nun ta too nos llibros (o nes pantalles). Anque ye una pantalla, la de la televisión, la que protagoniza un de los principales proyeutos que tien entamáu la comunidá educativa, bautizáu como "100 años de TV". "Valorámoslu como un tema mui curiosu", sorraya Julio Fernández, direutor del colexu, qu’a lo llargo del cursu afaló delles aiciones.
Una de les más vistoses, por casu, tuvo llugar nel Antroxu. Cada nivel educativu amarutábase d’un programa de televisión. Pel cole desfilaron, mesmamente, "personaxes" de "Los Picapiedra". Tamién tuvo presente la temática del "Un, dos, trés... respuenda otra vez", un "iconu" na so dómina, apunta Fernández. "Foi mui prestoso", diz el direutor al remembrar l’Antroxu. Un trabayáu "photocall", tituláu "Tele Piles" y con imaxes de dellos programes, preside la entrada del Ríu Piles, que tien hasta un marcu de televisión como adornu pol qu’Iris Morán, Sara Álvarez y Claudia Pérez, de quintu de Primaria, asomen la cabeza con entusiasmu.
Dende Infantil hasta Primaria, tolos cursos s’impliquen nel proyeutu. "Damos píldores d’aprendizaxe aprovechando esa motivación; cada vegada tien más sentíu utilizar coses de la vida diaria", sostién Julio Fernández, que destaca la vinculación de los aspeutos culturales coles árees curriculares. ¿Pa qué puede sirvir la iniciativa? Pa que los escolares apliquen los sos conocimientos matemáticos a la hora de valorar los costos d’un programa televisivu o pa redactar un guión tirando de les sos nociones de llingua.
La música tamién tien el so furacu nel colexu xixonés, que presume del so coru "Río Piles Suena", con estudiantes del últimu ciclu d’Educación Primaria. "Cantar xune, présta-yos y amás facemos una puesta n’escena guapa", declara la profesora Fátima Durán. El centru ye un de los participantes nel proyeutu "Cantar presta muncho", coordináu pol sierense Nacho Fonseca, p’averar la música coral a los colexos. "Nun naguamos por que lo faigan bien, sinón por que-yos preste", insiste Durán depués d’un ensayu animáu nuna de les clas.
"Xixón ye una ciudá con una tradición de música coral mui arraigonada", reivindica Nacho Fonseca, fundador de "Xentiquina", qu’empondera que la iniciativa puede xenerar "cantera" nes aules. "Como Mareo pal Sporting", fae gayasperu. "Nacho ye un referente y ye un honor trabayar con él en daqué tan guapo que fai por amor a la música y la llingua", asegura Fátima Durán, a la que de pequeña-y regalaron un "radiocassete" precisamente con un discu de "Xentiquina". Pa la docente, los neños "son el futuru y los que van llevar el legáu d’estos cantares, que formen parte de la banda sonora de la so infancia".
El colexu Río Piles tamién pon el focu en desaniciar la resquiebra de xéneru. Nel "hall" hai un "abecedariu de muyeres", con fotografíes y una biografía curtia de femes relevantes en dellos campos na hestoria, col aquel de "lluchar contra’l desdexu pa coles les figures femenines", proclama Fernández, direutor d’un colexu qu’apriende y pásalo en grande más allá de los pupitres.
