Un amigu, militante veteranu na izquierda (y cuando digo izquierda nun me refiero al centru-izquierda nel que Pedro Sánchez colocó esplícitamente al PSOE nestos tiempos electorales inseguros), viose nel casu, a la noche del domingu pasáu, de consolar al fíu podemista.
-¿Cómo puedes tar tan tranquilu? -escandalizábase'l rapaz.
-Porque toi fechu a ello. Yo siempre pierdo.
Sí. Perder ye connatural a la izquierda. Si un rasgu emocional distingue al izquierdista, más que la solidaridá ye la frustración. Yo digo que'l que nun se sienta políticamente frustráu nun puede ser d'izquierdes. La felicidá ye de dereches: nel paraísu d'Adán y Eva tovía nun había clase obrera.
El regustu de fracasu que dexen estes eleciones na xente de Podemos resulta ser, pa munchos d'ellos, los más mocinos, el so bautismu izquierdista (los compañeros de confluencia, nesi sen, lléven-yos muncha ventaxa) y una imprevista, anque indeseada, oportunidá pa madurar. Madurar ye descubrir la frustración: hai xuguetes que nun nos traen los Reis Magos, hai xente que nun se quier echar con nosotros, hai ciudadanos que nun nos voten. Pero, ¡atención!: esiste'l riesgu de garra-y gustu al fracasu. Abonda la épica romántica al respectu. Véase Corto Maltés, apuntáu a toles causes perdíes a priori, o'l marqués de Bradomín, carlista irredentu (que vien a ser tanto como decir antisistema). Ún, que nun ye pa nada joaquinsabinista nin forofu del Atleti, nun dexa d'admirar aquellos versos del himnu colchoneru: "¡Qué manera de sufrir / qué manera de palmar!" Ehí hai algo qu'engancha, sí señor.
Tol mundu nun ye sensible a les delicies melancóliques, masoquistes, de la derrota. Prueba d'ello ye la reacción de la cúpula socialista d'Asturies: Javier Fernández y Adriana Lastra abrazándose, contentos, na noche electoral. Como'l Sporting, felicítense por nun baxar de categoría. El pulsu nun yera pola copa: sería pol orinal:
-Doctor, ¿cómo va lo mío?, ¿qué dicen los análisis?
-¿Qué quier que-y diga? Pinta mal, nun sé pa cuánto tendremos?
-¿Y el mi vecín?
-Pol estilu. Nun acaba d'esporpollar.
-¡Ai, qué alegría me da, doctor!
Guaña una especie de sentimientu, asemeyáu al nacionalismu, ente los militantes d'un partíu políticu: un fervor poles sigles como'l d'otros poles banderes. Vamos llamalo "siglismu". El siglismu de Fernández y compañía respiró en mediu la debacle de la izquierda, que se supón que ye debacle de los parias d'esta tierra. Supongo que la FSA interpreta'l trunfu del PP como una mala noticia pa la sociedá, pero los males de la sociedá abúlten-y más llevaderos que los propios, los de la sigla. Y eso que, mírese per onde se mire, tien que resultar duro que la partida te la gane Mercedes Fernández, que tampoco ye Winston Churchill.
-¡No la ganó ella! ¡La ganó Mariano Rajoy!
-Llámalo X.
-¡Y no fui yo el que la perdió: fue Pedro Sánchez!
-¡A, bueno, gallu?! Siendo asina...
