A estes altures, seguro qu'usté ya vio vídeos comparando les palabres del presidente Trump nel discursu d'investidura y les del malu con bozal d'una película de Batman que secuestra tola población de Gotham City (entiéndase Nueva York) pa fumigala. Ye la mesma frase. Si nun lo vio y nun me cree, faiga como l'apóstol santu Tomás: entre en Youtube, escriba "Trump Batman people" y compruébelo. Fai referencia a una supuesta tresferencia del "poder" (misteriosu conceptu) a la xente: "We give it back to you? the people", dicen los dos: "Devolvémosvoslu a vosotros? el pueblu."
A mi, l'apropiación política de la frase, más qu'escandalizame (cosa difícil de verdá a estes altures), admírame. Los asesores de campaña de Trump merecen que nos quitemos el sombreru. Con un xustu conocimientu de la sociedá na que viven, con una intuición envidiable y, pa con ello, con un par de narices, echaron pal báter les catilinaries y el discursu de Marco Antonio qu'escribiere'l bardu de Stratford-upon-Avon y tiraron de la cadena. El güecu verbal que dexen les glories retóriques del pasáu ocupáronlu ("llenáronlu" diba ser decir muncho) con palabres d'un malu de película de superhéroes: con palabres del mundu "postreal". Y funciona. Funciona porque ye'l formatu más amañosu pal modelu actual de democracia.
La película estrenóse en 2012. Imaxino sentáu ente'l públicu, na sala escura d'un cine de Washington, pueser que llevando a la boca puñaos de palomites, al que diba formar parte, cuatro años depués, del equipu electoral de Trump. El malu, nun planu mediu enaltecedor, contrapicáu con columnes senatoriales al fondu, abre los brazos y suelta la frase pa un públicu de cuarta paré que son los espectadores. La fina sensibilidá del nuestru politólogu fai que se respigue, consciente de la bomba qu'acaben de manda-y. Azotáu, suelta pal suelu'l cucuruchu de palomites, echa mano del smart-phone y teclea, en carrera veloz contra la desmemoria: "Give it back?" Sabe que, algún día, va llegar el momentu de facer oru con esa piedra filosofal.
El guionista de la película (que ye tamién el director), Christopher Nolan, estudió Literatura Inglesa nun selectu "college" cerca de Londres. El previsible autor del discursu de Trump y usurpador de la frase de Nolan, Stephen Miller, ye "Bachelor of Arts", que vien a ser graduáu n'Humanidaes. La xente nun se para a pensar nel poder de les Humanidaes. Ensin los resultaos aparatosos y destructivos colos que les Ciencies positives contribuyen al caos bélicu bien de veces, les Humanidaes, de manera foína, escura, pueden resultar más letales: son quien a producir ondes espansives cerebrales qu'afecten a poblaciones enteres, reduciéndoles a la esclavitú voluntaria ensin falta d'arramamientu de sangre, de manera discreta y respetando les normes. Hai que-yos tener más mieu a les Humanidaes qu'a la Física atómica. Les guerres internes, guañu xenerador de les esternes, llúchense y gánense delantre un tecláu y una páxina de word, non guiando drones nin diseñando misiles.
La política d'ayudes a la investigación del Gobiernu asturianu favorez a los Centros Tecnolóxicos frente a la Universidá, y nun quiero nin pensar qué parte mísere, si la hai, llega a proyectos relacionaos coles Humanidaes. Nun son les tecnoloxíes lo que diferencia Francia d'Irán, por comparar repúbliques, sinón les facultaes onde se llee y comenta a Montaigne o a Voltaire. Los gobiernos que nun lo entiendan tán regalándo-yos la palabra y l'argumentación a los malos de película y a los sos avatares de la política real. Y esos sí les van usar como palanca pa facese depués con tol lote, incluyíos la Universidá y los Centros Tecnolóxicos.
miliorodriguezcueto.wordpress.com
