1. El de Ciudadanos que más pinta nel ayuntamientu d'Uviéu, primer teniente d'alcalde, retrucando, en plenu, al portavoz municipal de Somos, llamólu, esti martes, "Madurito local nivel madreña". Madurito con mayúscula, porque ye referencia a Nicolás Maduro, la llámpara venezolana (nota de desambiguación: el moluscu; la luminaria, non). El paralelismu personal nun sé si molestará o enorgullecerá al aludíu Rubén Rosón pero Caracas cai a miles de kilómetros del Cabu Peñes y a los demás trainos al frescu. Lo de "nivel madreña" ye otra cosa. El primer teniente d'alcalde apellídase Cuesta Areces. Con esos apellíos tan guapos (y esto nun ye ironía), imposible calcular cuántos pares de madreñes (¡cientos, miles...!) gastaríen los sos ancestros. Y, agora, insúltalos, porque'l sobrentendíu ye evidente: "nivel madreña", na cabeza del conceyal d'Urbanismu, ye subsótanu perfondu. A mi nun me paez que llevar corbata, como siempre se-y ve a él, te faiga más llistu o más honráu (menos tovía más guapu) que calzar madreñes, como los Cuesta y los Areces del pasáu. Cada cosa pide so ambiente. La madreña ta fuera de sitiu nun probador de Burberry o d'El Ganso pero la corbata tampoco ye amañosa pa cuchar, que fue lo que fexo Ignacio Cuesta'l martes. Entendemos qu'entiende qu'hai, n'Uviéu, un públicu votante que-y aplaude eses declaraciones, en consecuencia, que Cuesta piensa qu'esiste tovía un sector de la sociedá carbayona, a la qu'él representa y que se ven representaos por él, que sigue esibiendo, a estes altures, un despreciu ranciu pola xente de(l) pueblu. Pa cargar con esos complexos, munchos muertos en madreñes hai que guardar embaxo l'alfombra. Nun sé: igual acierta y son lexón... o igual s'enquivoca y ye namás él, Ignacio Cuesta, l'arrenegáu de la madreña. Pero, si esi ye'l casu, ¡que-y diga alguién de confianza que ta solu, por favor!
2. L'arzobispu Sanz Montes píde-y a la Santina que salve España. Oiga: ¿y si ya lo ta faciendo?, ¿y si resulta que ye de Podemos? A fin de cuentes, okupó un portal.
3. Una pega restolaba ente la foyarasca d'un xardín públicu. Dio con un palucu, una cañina seca, garrola en picu y echó a esnalar pa les altures, pa les de verdá, cola misión evidente d'iguar el ñeru del añu pasáu, que los temporales de la seronda debieron dexa-y con goteres. Eso yera'l martes día 7, cuando s'esprecetaba y armaba un guirigái de mil demónganos la tribu de mamíferos primates españoles, consecuentes cola so condición d'animales gregarios y alborotadores. Indiferente, la pega respuende con xacíu a la llamada de los eternos ciclos naturales. A ella, ningún gobiernu va estrocia-y el país, ningún rei la representa, nun depende de los aciertos de Sánchez nin de la vixilancia de Casado, nun tien nacionalidá que defender. Básta-y con apartase del suelu pa escapar de too eso.
miliorodriguezcueto.wordpress.com
