Pa siguir siendo
Cola crisis Asturies cuerre peligru de desaparecer como entidá

Pa siguir siendo
antón garcía
Abre'l nuevu númberu de la revista Asturies una reflexión editorial sobre la crisis, llamando l'atención sobre'l peligru de desaparecer como entidá que cuerre Asturies ("morrebundu desarmáu que se desangra"); darréu repasa la clas política, interesada -dicen- "sólo en caltener la so posición a cualquier preciu", y a la qu'apelliden d'incompetente, irresponsable y corrupta, culpándola de la situación cultural y llingüística que cadecemos. Asina, denuncien l'estáu de la braña de La Pornacal, de tantos teitos del suroccidente o del horru de Vibuli, que desaparecen mientres siguen saliendo pimpantes nes guíes turístiques. L'entamu termina reafirmándose nos principios que mueven la salida d'esta publicación dende l'empiezu: "Los asturianos siguimos teniendo Asturies nes nueses manes", y, "pa siguir siendo", "la conocencia de lo que fuemos y somos" "tien que ser l'encontu pal remanecer d'un país con un patrimoniu únicu pero tamién universal, el nuesu".
Col despligue gráficu habitual, van sucediéndose los artículos: Ignacio Abella fala del felechu y el so aprovechamientu. Xuan Fernández-Piloñeta, Daniel Cueli y Alberto Á. Peña anuncien un nuevu castru en Piloña, El Castillón d'Antrialgu. Ástur Paredes y Gausón Fernánde dan cuenta de cómo se desanicien los horros "beyuscos", tan particulares coles sos cureñes horizontales y cubierta a dos agües. Sigue una colección de semeyes antigües sobre la caza del osu (onde s'aprecia un tamañu nos bichos muncho menor de lo que pintaben los antiguos grabaos), otra colaboración d'Alberto Peña sobre la representación de la sierpe nos retablos asturianos, y de nuevo Gausón Fernande nos apurre un trabayu sobre la montera que cubría la cabeza de los nuesos antepasaos. Jesús Suárez repasa la lleenda asturiana de la muyer selvaxe qu'echa la espetera al costín y los sos pareyos universales.

Pa siguir siendo
Cásique un terciu del conteníu d'esti númberu 33 d'Asturies ocúpalu un llargu y bien interesante artículu de Xulio Concepción, "Siempre de camín, ente la casa y la cabana". Ye una contribución qu'estudia la relación del ser humanu coles brañes, nun movimientu estacional posiblemente milenariu: igual que los animales, el vaqueru busca los altos na primavera y queda ellí, na cabana, hasta que termina la toñada serondiega, cuando vuelve baxar camín de casa. Concepción fai esti viaxe pa nós sobre'l papel couché atendiendo a tolos aspectos: medios de tresporte, construcciones, zarros, el fueu, la comida, el fresnu, los animales, los trabayos y los trebeyos, el lleche y los derivaos, les plantes y el so aprovechamientu... Termina Xulio Concepción como empezaba la revista, quexándose de los políticos a cuenta de Braniel.lín (el Brañilín que ye agora estación d'esquí), porque nun dexaron nin una de les vieyes cabanes cuando urbanizaron la braña: "predar nun ye lo mesmo que depredar", concluye l'autor.
Paga la pena, per otru llau, observar nesta revista la evolución de la manera vistir: nes fotos más antigües vense asturianos con montera, calzón curtiu, xilecu... Ye la ropa qu'agora recreen los grupos d'investigación etnográfica, el traxe tradicional. Marcelino'l de Teyeo (páxina 61) viste'l modernu traxe de faena que s'atopa nos pueblos: visera, funda azul enriba'l xerséi y botes de goma.
- Ortega Cano emite un comunicado tras lo ocurrido con el hijo de Ana María Aldón: 'Es un poco duro...
- Última hora del estado de salud de Marta Peñate: 'Una quimioterapia
- La reacción del Arzobispado a la llegada de las religiosas excomulgadas a Asturias: 'Ni son monjas ni...
- Resuelven diez años después el misterio del cadáver de Somiedo con malformaciones y encarcelan a sus dos hermanos por abandonarlo: una triste historia
- TSK busca un inversor o una venta para garantizar su futuro y ya hay fondos interesados
- Este es el original nombre que Cristina Pedroche ha elegido para su bebé: 'Creando vida
- Los tres países a los que Arcelor desvía su inversión (y en uno construirá otra acería)
- Fallece el querido miembro de La que se avecina, donde trabajó 14 temporadas