Xaime Martínez (Uviéu, 1993) ayuda a definir el talentu: axunta xuventú y aptitú, amuesa una chocante madurez y saca resultaos mui favorables en tolos sos trabayos. Músicu y escritor con currículu, premiáu dientro y fuera d'Asturies (II "Concursu Lliterariu Universidá d'Uviéu" coles poesíes d' El tango de Penélope y los relatos de Los tres mil cuentos de Marcelino Tongo -esti últimu escritu en colaboración con Diego Álvarez- y XVII "Premio de Poesía Joven Antonio Carvajal" con Fuego cruzado) ofrez nesta ocasión los sos poemes escritos n'asturianu ente los diecisiete ya los venti años, recoyíos col títulu d'Hibernia (Saltadera, 2017). Lo que sí resulta más natural nel casu d'un autor tan mozu ye l'apegu a la tradición y al clasicismu, en fondu y forma, y tamién la exhibición de fontes y de referentes culturales, anque inxertaos y trataos con curiosidá, de manera que nun acobarden pa una llectura natural y amena.
Hibernia ye, sentimentalmente, un universu mui afayadizu pa un asturianu: la so historia, antigua y reciente, tien pa nós una cercanía especial y supón un vínculu emocional nel que siempre apetez somorguiase, un bon escenariu y puntu de partida p'asentar el mundu de Xaime Martínez, la educación y les circunstancies que fixeron d'él l'artista que ye nesta poesía. Aprovecho güei con gratitú los versos d' Adam Zagajewski: "Alredor de nós estiéndese la prosa del mundu, / y nun ventrículu del corazón, la poesía anicia, aliella". Eso fai mui bien l'autor d' Hiberbia: asomase al mundu pa contar la historia, tomar partíu, escoyer bandu y dar la batalla de la poesía. Efectivamente hai poemes que trescurren n' Hibernia, el país maraviyosu nel que l'arpa ye'l símbolu nacional. La mitoloxía, les lleendes, la historia, los héroes y el paisaxe trescienden hasta'l llector con elegancia, en composiciones narratives con señes épiques o irónicamente épiques. N'otres ocasiones, la historia y la lliteratura son desdramatizaes n'intelixentes versiones humorístiques, ofreciendo puntos de vista inéditos, como en "La flecha" o en "Shakespeare". La querencia del poeta polo clásico apaez na recreación de los tópicos lliterarios, con guapos y modernos exemplos del carpe diem, del iter vitae o cuando apurre l'exerciciu bien resueltu d'una cantiga d'amigu. Los gustos del músicu tán mui presentes en varies composiciones y tamién les debilidaes del mitómanu, como nos homenaxes al universu de Star Wars y nos testos cínicamente devotos fechos pa Emma Watson o Carrie Fisher. Lo cotidiano tampoco escapa a la mirada escucadora de Martínez: la rutina de los díes na universidá: "Andábemos, anque nun sé si díbemos / dica la facultá o seique distrayendo / el tiempu con más tiempu vano", les amistaes, l'amor, el momentu d'enfrentase al futuru o la importancia del azar a la hora de determinar la vida. Tamién Asturies tien sitiu esclusivu nuna composición qu'axunta la esencia vieya y los restos modernos y dexa un resultáu tan bien consiguíu: "El nuesu imperiu foron la pólvora y la mina / l'arcón, el viaxe y l'aguardiente. / Foi la borrina y foi la lluvia/ -símbolos de la nuesa suerte- / [?] De too aquello queden solamente / ocalitos, palacios mudos, muelles / que nun tienen mal barcu que los use -y tamién falen de la nuesa muerte-". Poemes de Philip Larkin, Robert Pinsky, Máirtín ó Diréain, traducíos ya intercalaos pel poemariu, completen el llibru.
El poema final ye la esplicación de la metapoesía d'Hibernia: dellos versos cinematográficos y señardosos analicen una escena doméstica ya intrescendente de la infancia del escritor, tratando d'acercase al descubrimientu d'esa emoción que paga la pena ser contada y que supón llograr la inmortalidá. De xuru que Xaime Martínez va siguir atinando nel futuru.
